"Манчестер Сити" қаторига яна бир клуб қўшилиши мумкин

"Манчестер Сити"га эгалик қилувчи City Football Group холдинг компанияси яна бир футбол клубини харид қилишни режалаштирмоқда.

Daily Mail нашри хабарига кўра, араб компаниясини Франция иккинчи дивизони иштирокчиси "Нанси" клуби қизиқтирмоқда.

Агар ушбу келишув амалга ошадиган бўлса, унда "Нанси" City Football Group холдинг компаниясининг  ўнинчи клубига айланади.

Холдинг "Мумбаи Сити" (Ҳиндистон), "Нью-Йорк Сити" (АҚШ), "Мельбурн Сити" (Австралия), "Йокогама Маринос" (Япония), "Сичуань Цзюню" (Хитой), "Жирона" (Испания) ва "Атлетико Торке" (Уругвай) клубларини бошқариб келади.