“Манчестер Сити” қайта шакллантирилади

“Манчестер Сити” бош мураббийи Хосеп Гвардиола жамоани тезроқ қайта шакллантириш, сезиларли даражада ўзгартириш пайти келганини таъкидлади.

“Шаҳарликлар” жорий мавсум Англия чемпионлиги унвонини ҳимоя қила олмайди, энг нуфузли турнир – Чемпионлар лигасидан чиқиб кетди.

Хосеп Гвардиола шогирдлари фақат Премьер-лигада кучли тўртликка кириб, келаси мавсум учун Чемпионлар лигаси йўлланмасини олиш ҳамда Англия кубогини қўлга киритиш учун курашади.

- Тўғрисини айтсам, мавсум бошидан вазият бунақа авж олишини кутмаган эдим. Агар бундай бўлишини билганимизда жамоани янгилашни ўтган ёздан бошлардик. Бизнинг аҳволимизда жамоани қайта шакллантиришни эртароқ бошлаш керак. Барибир бу ишни қилиш керак, - деди Хосеп Гвардиола.

Чемпионатнинг биринчи қисмидаги инқироздан кейин манчестерликлар январь ойининг ўзида 200 миллион евродан ортиқ харажат қилиб, Абдуқодир Ҳусанов, Нико Гонсалес, Витор Рейс ва Умар Мармушни ўз сафига қўшиб олди. 18 ёшли Витор Рейсдан ташқари уч нафар янги ўйинчи жамоа учрашувларига мунтазам жалб қилинмоқда.