Манчестер суперклуби кутилмаган трансфер учун “Реал”га 200 миллион евро тўлайди

“Реал”ни ўтган ёзда Хаби Алонсо қабул қилиб олганидан кейин испаниялик мутахассис қўллаётган ўйин услубига кўника олмаётган Жуд Беллингем жамоасини ўзгартириши мумкин.

Англия Премьер-лигасидаги мавқеини тиклашган уринаётган “Манчестер Юнайтед” раҳбарияти жамоага етакчилик қила оладиган маҳорат ўйинчи қидирмоқда. Манчестерликлар ана шу мақсадни амалга ошириш учун “Реал”га 22 ёшли ярим ҳимоячи Жуд Беллингем трансфери бўйича 200 миллион евро миқдорида таклиф тайёрламоқда.

Рубен Аморим жамоаси бу трансферни 2026 йилнинг ёзида амалга оширишни мўлжаллаяпти.

OK Diario нашри хабарига кўра, англиялик плеймейкер “Қироллик клуби” сотувга қўйишни режалаштирган беш футболчидан бири ҳисобланади.

Беллингем “Реал”га 2023 йилнинг ёзида Дортмунднинг “Боруссия” клубидан кўчиб ўтган эди. Унинг амалдаги шартномаси 2029 йилнинг ёзигача давом этиши белгиланган. Transfermarkt портали маълумотларига кўра, унинг бозор қиймати 160 миллион еврони ташкил қилади.