«Манчестер Юнайтед» Англия терма жамоаси ҳужумчисини сотиб олмоқчи

«Манчестер Юнайтед» раҳбарияти «Астон Вилла» ва Англия терма жамоаси ҳужумчиси Олли Уоткинсни ўз сафига қўшиб олиш имкониятини кўриб чиқмоқда.

The Sun нашри хабар беришича, манчестерликлар ушбу ёзда жамоани тарк этиши мумкин бўлган нидерландиялик форвард Жошуа Зиркзее ўрнини айнан Уоткинс билан тўлдиришни режалаштиряпти. Агар Зиркзее кетадиган бўлса, «Манчестер Юнайтед» «Астон Вилла»га расмий таклиф йўллашга тайёр. Бирмингем клуби ўз ҳужумчиси учун тахминан 45 миллион евро атрофида маблағ ишлаб олишни кўзламоқда. Шу билан бирга, Англия терма жамоаси форвардига «Арсенал» ва Туркиянинг «Фенербахче» клуби ҳам даъвогар сифатида қайд этилмоқда.

Эслатиб ўтамиз, ўтган мавсумда Олли Уоткинс Англия чемпионатида «Астон Вилла» таркибида 37 та ўйинда майдонга тушиб, 16 та гол урди ва 3 та голли узатма амалга оширди.