"Манчестер Юнайтед" "Арсенал"га узоқ кутилган зарбани берди!

"Манчестер Юнайтед" анча вақтдан бери ҳеч ким қила олмаган ишни уддалади. "Қизил иблислар" меҳмонда "Арсенал"ни 3:2 ҳисобида мағлуб этиб, рақиб дарвозасига учта тўп киритди.

"Opta" маълумотларига кўра, бу 2023 йил декабридан бери илк бор "Арсенал" бир ўйинда икки тадан ортиқ гол ўтказиб юборган ҳолат бўлди. Ушбу серия барча мусобақаларни ҳисобга олганда 121 та учрашувни ўз ичига олган.

Микель Артета жамоасига уч ёки ундан ортиқ гол ура олган сўнгги клуб "Лутон Таун" бўлган эди. Ўша баҳсда лондонликлар 4:3 ҳисобида ғалаба қозонган, мавсум якунида эса "Лутон" олий дивизионни тарк этган.

Эслатиб ўтамиз, "Арсенал"га қарши мазкур учрашув Майкл Кэррик қўл остидаги "Манчестер Юнайтед" учун атиги иккинчи ўйин бўлди.