“Манчестер Юнайтед” гол ўтказмайдиган дарвозабонни кутмоқда

Узоқ йиллар давомида дарвозабон масаласида хотиржам бўлган “Манчестер Юнайтед” раҳбарияти ёзда янги посбон олишга ҳаракат қилмоқда.

Бош мураббий Сульшер ёзда Давид де Хеани сотиб юбормоқчи. Чунки испаниялик посбон кейинги пайтда кўп хато қилмоқда. Унинг иккинчи дарвозабон Дин Хендерсон билан рақобати ички муҳитга салбий таъсир қиляпти.

Ҳозирча, манчестерликлар “Атлетико” посбони Ян Облакни мўлжалга олган. Мадридликлар соврин юта олмаётгани боис, Облак жамоасини ўзгартирмоқчи. 28 ёшли словениялик дарвозабон жуда кам гол ўтказади ва дунёнинг энг кучли дарвозабонларидан бири сифатида эътироф этилган.

Агар “Атлетико” жорий мавсумда Испания чемпионатида ғолиб чиқмаса, Ян Облак раҳбариятдан уни қўйиб юборишни сўрамоқчи. “Атлетико” хўжайинлари унинг трансферини 120 миллион еврога баҳоламоқда.

Ян Облакка “Манчестер Юнайтед”дан ташқари “Челси” ҳам жиддий қизиқиш билдиряпти.