"Манчестер Юнайтед" иккинчи дарвозабон изламоқда

“Манчестер Юнайтед” ёзги трансфер ойнасини дарвозабонлар чизиғини қайта шакллантиришдан бошламоқда. Клуб “Лидс Юнайтед” посбони Карл Дарлоуни кутилмаган тарзда номзод сифатида кўриб чиқмоқда. У “Олд Траффорд”да Алтай Байиндир ўрнига иккинчи рақамли дарвозабон бўлиши мумкин. Шу билан бирга, “Вулверхэмптон” дарвозабони Сэм Жонстон ҳам манчестерликлар диққат марказида турибди.

35 ёшли Дарлоу маҳаллий тарбия топган футболчи сифатида рўйхатга олиниши клуб учун қўшимча плюс ҳисобланади. Премьер-лигада маҳаллий футболчилар лимити муҳим омил бўлгани учун, тажрибали дарвозабоннинг айнан шу мақомга эга экани “Юнайтед” раҳбарияти томонидан ижобий баҳоланмоқда. Шу билан бирга, Дарлоуга “Тоттенхэм Хотспур” ҳам жиддий қизиқиш билдирмоқда.

Сэм Жонстон ҳам маҳаллий тарбия топган дарвозабон сифатида қайд этилмоқда. У ўз вақтида айнан “Манчестер Юнайтед” академиясида тарбия топган ва ҳозирги шорт-листдаги асосий номзодлардан бири ҳисобланади.

Ўтган мавсум Жонстон тушиб кетган “Вулверхэмптон Уондерерс” жамоасида захира дарвозабони сифатида хизмат қилди. Бироқ елкадан олган жароҳати сабаб мавсумнинг охирги қисмида майдонга туша олмади.

“Манчестер Юнайтед” раҳбарияти бир вақтнинг ўзида Алтай Байиндир ва Андре Онаданинг келажагини ҳам кўриб чиқмоқда. Ҳар икки дарвозабон ҳам ҳозирча клубнинг узоқ муддатли режаларида асосий фигура сифатида кўрилмаяпти ва улар билан хайрлашиш эҳтимоли катта.

Шу орада, ўтган ёзда 18 миллион фунт эвазига келган Сенне Ламменс жамоанинг биринчи рақамли дарвозабонига айланиб улгурди. У 2025 йил октябрида дебют қилганидан сўнг “Олд Траффорд”да асосий посбон сифатида ўз ўрнини мустаҳкамлади.

Клуб шунингдек ёш дарвозабон Радек Витекни ҳам сақлаб қолиш тарафдори. Чехиялик посбон ўтган мавсумни “Бристол Сити”да ижара асосида ўтказиб, ўйини билан яхши таассурот қолдирган. Аммо у доимий ўйин амалиётига эга бўлишни истамоқда, бу эса унинг келажаги борасида саволлар туғдирмоқда.

Тажрибали Том Хитон эса яқинда “Манчестер Юнайтед” билан янги шартнома имзолаб, клубда учинчи рақамли дарвозабон сифатида қоладиган бўлди.

Шунга қарамай, Карл Дарлоу ёки Сэм Жонстон каби захира дарвозабонни олиш ҳозирча “Юнайтед” учун энг устувор вазифа эмас. Клубнинг асосий эътибори Чемпионлар Лигасига қайтиш арафасида чап қанот ҳимояси ва ярим ҳимоя чизиғини кучайтиришга қаратилган.