Манчестерга бир футболчи келди, иккитаси кетади!

Келаси мавсум Европа Чемпионлар лигасида ўйнайдиган “Манчестер Юнайтед” клуби таркибини кучайтириш мақсадида “Аталанта” ярим ҳимоячиси Эдерсон трансферини якунлади.

Бу ҳақда журналист ва инсайдер Фабрицио Романо X ижтимоий тармоғида хабар берди.

Манба маълумотига кўра, мазкур трансфер манкунианларнинг ёзги трансфер ойнасидаги марказий ярим ҳимояга қилинган биринчи хариди бўлади. Чунки Каземиро ва Мануэль Угарте жамоани тарк этади. Шу сабабли манчестерликлар таркибини яна камида битта, маълум шартлар бажарилса, ҳатто икки нафар ярим ҳимоячи билан кучайтиради.

Аввалроқ, Эдерсоннинг “Манчестер Юнайтед” билан 2030 йил июнигача амал қиладиган шартнома имзолаши, келишув яна бир йилга узайтириш имкониятини ўз ичига олиши хабар қилинган эди.

Трансфер суммаси 40,5 миллион еврони ташкил этади. Яна 4,5 миллион евро бонуслар кўринишида тўланади.

Эдерсон 2022 йил ёзидан буён “Аталанта” сафида ўйнаб келмоқда. Ўтган мавсумда 26 ёшли марказий ярим ҳимоячи барча мусобақаларда 41 та ўйинда қатнашиб, учта гол ва иккита голли узатма муаллифи бўлди.

Transfermarkt портали бразилиялик футболчининг бозор қийматини 45 миллион евро деб баҳоламоқда.