Manchesterliklar ikki zo‘r hujumchini nishonga oldi

Joriy mavsumni Angliya Premier-ligasining yuqori pog'onalaridan birida yakunlash uchun kurashayotgan “Manchester Yunayted” yozgi transfer oynasida chap qanot hujum pozitsiyasini kuchaytirish uchun ikki futbolchini belgilab oldi.

Markaziy chiziqdan tashqari, “Yunayted” kelasi yozda yana bir nechta pozitsiyalarni kuchaytirishni rejalashtirmoqda. Ular qatorida chap qanot ham bor.

Sky Sports ma'lumotiga ko'ra, bu rol uchun manchesterliklar “RB Leyptsig”dan Yan Diomande va “Everton”dan Iliman Ndiaye nomzodlarini ko'rib chiqmoqda.

19 yoshli Diomande Yevropa grandlari orasida katta qiziqish uyg'otmoqda va Angliyaning amaldagi chempioni “Liverpul” uni jamoani tark etadigan Muhammad Saloҳga o'rinbosar sifatida ko'ryapti.

26 yoshli Ndiaye transferi esa, ancha qimmatga tushishi mumkin. Uning asosiy ustunligi Premier-ligada o'ynash tajribasiga ega ekani.

Shuningdek, “Manchester Yunayted” rahbariyatiga Morgan Rojers (“Aston Villa”) varianti ham yoqmoqda. Agar Birmingem klubi Chempionlar ligasiga chiqa olmasa, qimmatbaho hujumchi sotuvga qo'yilishi mumkin.