Manchesterliklar osiyolik futbolchini oladi

Angliya Premier-ligasidagi mavqeini tiklab borayotgan “Manchester Yunayted” yozgi transferlar oynasi davrida tarkibini yangi ijrochilar bilan kuchaytirish masalasiga ham e'tibor qaratmoqda.

Manchesterliklar Yaponiya milliy terma jamoasi va “Lids Yunayted” klubi markaziy yarim himoyachisi Ao Tanakaga qiziqish bildirgan klublardan biri hisoblanadi.

Bu haqida TEAMtalk xabar bermoqda.

Manba ma'lumotiga ko'ra, “tovuslar” 27 yoshli futbolchisining transferi uchun taxminan 17 million yevro talab qilishi mumkin. Tanaka o'zi ham kelasi yozda klubini o'zgartirishga tayyor.

Yapon yarim himoyachisi uchun kurashda “Manchester Yunayted”ga “Nyukasl Yunayted” va “Everton” klublari raqobat qilishi mumkin.

Joriy mavsumda Tanaka barcha musobaqalarda 26 ta o'yinda qatnashib, to'rtta gol urdi. Uning klub bilan amaldagi shartnomasi 2028 yil yozigacha amal qiladi. Transfermarkt portali ma'lumotiga ko'ra, futbolchining bozor qiymati 10 million yevroni tashkil etadi.

Yaponiya terma jamoasi safida Tanaka 37 ta o'yin o'tkazgan.