Марадонанинг мероси учун 16 киши даъвогарлик қилмоқда

Афсонавий футболчи Диего Марадонанинг бойликлари учун жиддий кураш бошланди. Бу ҳақда The Sun нашри хабар тарқатмоқда.

Юқоридаги манбага кўра, мерос учун марҳумнинг 5 нафар қонуний ва 7 нафар никоҳсиз фарзандлари ҳамда 4 та синглиси, жами 16 нафар қариндоши даъвогарлик қилмоқда.

Марадонанинг жами бойлиги 40 миллион еврога баҳоланмоқда. Унга нақд пул, турли мамлакатлардаги мулк ва ҳашаматли автоуловлар киради.

“ЖЧ-1986” ғолиби ўлимидан олдин ҳеч қандай васият қолдирмаган ва шу сабабли унинг мероси суд орқали бўлиб берилади.

Марадона жорий йилнинг 25 ноябрь куни юрак тўхташи оқибатида 60 ёшида вафот этган эди.