Марко Станоевич "Пахтакор"га ўтиши мумкинлиги ҳақидаги миш-мишларга изоҳ берди

SPORTS.uz эксклюзив интервьюларни тақдим этишда давом этади. Бу сафарги меҳмонимиз - Қаршининг "Насаф" жамоаси ярим ҳимоячиси Марко Станоевич. Сербиялик футболчи суҳбат давомида фаолияти, "Пахтакор"дан таклиф ва бошқа кўплаб мавзулардаги саволларга жавоб берди.

Ортда қолган мавсум ҳақида фикрларингиз қандай?

- Яхши мавсумни ўтказдик. Қизиқарли баҳсларга бой бўлганига қарамай, АФК кубоги финалида мағлубиятга учрадик. Мана шу дилни хира қилди. Бундан ташқари, ички биринчиликда ҳам ўзимиз ҳақли бўлган ўринда чемпионатни якунлай олмадик. Яхшиям-ки, Ўзбекистон кубоги финалида ўзимизга келдик. Менимча, финал ўйинида иштирок эта олмаганим ҳам "Насаф"га қўл келгандек (кулади) туюлди.

Сўнгги пайтларда сиз билан "Пахтакор" жамоаси қизиқиш билдираётгани ҳақидаги миш-мишлар кўпайиб кетди?!

- Тўғриси, футболчини қайсидир бошқа клубга ўтиши борасидаги миш-мишларнинг бўлиши табиий. Шунга қарамай, "Пахтакор" клуби мен билан алоқага чиққани йўқ. Ҳеч ким қўнғироқ ҳам қилмади. Энг яқин дўстим - Драган Черан пойтахт клубида тўп суришидан хабарингиз бор. Очиғи, менда ҳам унда ҳам бирга тўп суриш истаги мавжуд. Балки, бу қачондир насиб қилар.

Қаршида яна қанча қолмоқчисиз? Режалар қандай?

- "Насаф" билан шартномам йил охирида якунига етади. Шунга қарамай, ҳеч қаерга кетмоқчи эмасман. Менда ва клубда ҳамкорликни давом эттириш истаги мавжуд. Энг муҳими, икки томон ҳам бир-бирига керак эканлигини ҳис этмоқда. Келишув амалга ошса, Қаршида қолишдан манфаатдорман. Сабаби, бу клубдаги барча шароитлар мени қаноатлантирмоқда.

"Аждарлар" ФИФА томонидан трансфер тақиқига учрагани ҳақидаги хабар тарқатилгач, клуб мухлислари хавотирга тушиб қолди. Бу вазиятга муносабатингиз қандай?

- "Насаф" яхши шаклланган жамоа. Бу кеча ёки бугун тузилган клуб эмас. Ўз мақсадлари, ўз режалари асосида ҳаракат қиладиган яхлит механизм. Шу боис, бу вазиятдан ортиқча талофатсиз чиқиб кетишимизга ишончим комил. Хавотир олишга ҳожат йўқ. Асосийси, бизнинг аксарият футболчиларимиз билан ўртадаги шартнома узайтирилган. Қолганини вақт кўрсатади.

Агар Ўзбекистон терма жамоасидан таклиф келиб тушса, қабул қилармидингиз?

- Албатта! Бу мен учун улкан шараф! Агар бундай имконият тақдим этилса, ундан унумли фойдаланган бўлар эдим. Сабаби, терма жамоа либосида тўп суриш ҳар қандай футболчи учун болалигидаги орзуларидан бири саналади. Агар имкон берилса, ўзбек футбол мухлисларини хурсанд қилиш учун қўлимдан келганича ҳаракат қилган бўлар эдим.

Нима деб ўйлайсиз, келаси мавсумда "Насаф"да чемпионлик учун имконият қандай?

- Ҳозирги "Насаф" ёшартирилган, аммо жамоавий ўйинда яхши ҳаракат қилади. Мана 2 йилдан бери йигитлар билан елкама-елка ўйнаяпмиз. Жамоа аъзолари аллақачон майдонда бир-бирини кўрмай пас ташлай оладиган даражага кўтарилди. Асосий футболчилар кетмаса, бу йигитлар билан бемалол чемпионлик учун курашиб кўрсак бўлади. Муҳими, бунинг учун бизда имконият бор. Ундан фойдаланишга уриниб кўрамиз.

Умумий қилиб айтганда, Ўзбекистонда футбол ривожланяпти деб айта оласизми?

- Албатта! Ҳар мавсум янгидан-янги ёш ва иқтидорли футболчилар етишиб чиқмоқда. Кўп ўтмай, улар Ўзбекистон футболини янги даражага олиб чиқади деб умид қиламан. Ўйлашимча, ҳозир юртингизда футбол ривожланмоқда. Агар шу темп билан давом этилса, яқин йиллар ичида катта ғалабалар ҳам келади.

Я . У