Маркус Рэшфорд «Фенербахче»га ўтишни режалаштирмаяпти

«Манчестер Юнайтед» ҳужумчиси Маркус Рэшфорд Туркиянинг «Фенербахче» жамоасига ўтиш имкониятига қизиқмаяпти, деб хабар бермоқда Sports.kz нашри Football Insider манбасига таяниб.

Маълумотларга кўра, Стамбул клуби 28 ёшли англиялик футболчига жиддий қизиқиш билдирган ва трансфер ойнаси ёпилгунча уни сотиб олиш вариантларини кўриб чиқмоқда. Шу билан бирга, ўйчининг ўзи фаолиятини Европанинг бешта етакчи чемпионатидан бирида давом эттиришни истамоқда. 

Манбага кўра, Рэшфордга даъвогарлар орасида «Тоттенхэм» ва «Астон Вилла» клублари бор.

— Менимча, бу трансфер амалга ошиши жуда қийин. Илгари ҳам Рэшфордни турк жамоалари билан боғлашган, аммо карьерасининг ҳозирги босқичида у Туркияга кўчиб ўтиш истагини ҳеч қачон билдирмаган, — дея таъкидлаган журналист Пит О’Рурк.

Шу билан бирга, ҳужумчининг «Манчестер Юнайтед»даги келажаги ҳали ҳам ноаниқлигича қолмоқда. Ўтган мавсумда Рэшфорд «Барселона» сафида ижара асосида ўйнаб, 49 учрашувда 14 та гол урди ва 11 та голли пас берди. Шунга қарамай, каталонияликлар футболчини тўлиқ сотиб олиш имкониятидан фойдаланмасликка қарор қилган.