Марсело фаолиятидаги энг яхши ва энг оғир "Эл-класико" ҳақида гапирди

"Реал"нинг собиқ ҳимоячиси Марсело фаолиятидаги энг яхши "Эл-класико" ўйинлари ҳақида фикр билдирди.

"Мен икки ҳолатни танлаган бўлардим. Биринчиси — Чемпионлар лигасининг ярим финалида "Камп Ноу"да урган голим. Бу бироз аччиқ-ширин хотира, чунки биз ўша қарама-қаршиликда ғалаба қозона олмаганмиз.

Иккинчиси эса ўша мавсумдаги Кубок Испания финали. Биз ўша ўйинда қўшимча вақтда Криштиану Роналду урган гол эвазига ғалаба қозонганмиз. Пеп Гвардиола даврида “Барселона” жуда устунлик қиларди, шунинг учун ўша кубокни ютиш жамоа учун катта енгиллик ва ғурур бўлган", — деди Марсело.

Бразилиялик футболчи "Барселона"га қарши энг оғир ўйинни ҳам эслаб ўтди.

"Бу — 2010/11 мавсумида “Камп Ноу”даги 0:5 ҳисобидаги мағлубият. "Барселона" бизга ҳақиқий футбол дарсини берган. Биз ўйинни ёмон бошламаган эдик, лекин голлар кетма-кет урилди ва ўзимизни бутунлай ожиз ҳис қила бошладик.

Бу жуда оғир “класико” эди. Бизда ўйинга қайтиш учун деярли ҳеч қандай имконият бўлмади. Ҳисоб 0:4 бўлиб, ўйин тугашига ўн дақиқа қолганда, барчамиз деярли ечиниш хонасига кетишни хоҳлаб қолган эдик, чунки бу ҳисобни қутқариш имконсиз эди", — дея қўшимча қилди Марсело.