Мартинес Мессининг Аргентина терма жамоасидаги сўнгги ўйини ҳақида фикр билдирди

Аргентина терма жамоаси дарвозабони Эмилиано Мартинес Лионель Мессининг миллий жамоадаги фаолиятини якунлаши ва унинг терма жамоага кўрсатган улкан таъсири ҳақида фикр билдирди.

Буркина-Фасога қарши ўртоқлик учрашувидаги 7:0 ҳисобидаги ғалабадан сўнг Мартинес Мессининг жаҳон чемпиони бўлиши учун қўлидан келган барча ишни қилишга ҳаракат қилганини айтди.

«Албатта, унга қўлимдан келганича ёрдам беришга ҳаракат қилдим ва у буни билади. Биз бу ҳақда доимо гаплашамиз. Мен учун фаолиятимдаги энг буюк шараф — унга энг кўп истаган нарсасига эришишда ёрдам бериш бўлди. Чунки у тарихдаги энг буюк футболчи», — дея футболчининг сўзларини Goal келтирди.

Терма жамоанинг Мессисиз келажаги ҳақида гапирар экан, дарвозабон шундай деди:

«У кетганидан сўнг улкан бўшлиқ қолади, аммо жамоада характерли йигитлар бор».

6 октябрь куни Аргентина «Монументаль» стадионида Бенинга қарши ўйнайди. Бу учрашув Месси учун миллий жамоа сафидаги сўнгги ўйин бўлади.

«Мен бу жараённинг бир қисми бўлишни хоҳлайман. Сешанба куни фақат шу лаҳзадан завқланишни ва унинг табассумини кўришни истайман. Бирга қолган озгина вақтимизни қадрлашга ҳаракат қиламиз», — деди Мартинес.

Буркина-Фасога қарши учрашув Мартинес учун Аргентина терма жамоаси сафидаги 69-ўйин бўлди. У ушбу баҳсларнинг 45 тасида ўз дарвозаси дахлсизлигини сақлаб қолган.