"Mash’al" "Qizilqum" maydonida qachon g‘alaba qozongan?

O‘zbekiston Superligasining 12-tur bahslariga 2 iyul kunidan start beriladi. Navoiyning “Qizilqum” klubi shu kuni o‘z maydonida Muborakning “Mash’al” jamoasini qabul qiladi. Mazkur uchrashuvga “Qizilqum” 5-o‘rinda, “Mash’al” esa 11-pog‘onada etib keldi.

E’tiborlisi, navbatdagi to‘qnashuv jamoalarning o‘zaro 33-o‘yiniga aylanadi. Bunga qadar o‘tkazilgan 32 ta uchrashuvdagi kichik ustunlik “Qizilqum” tarafida. Chunki navoiyliklar raqibini 10 marta mag‘lub etgan. “Mash’al” bunday imkoniyatga 9 bor erishgan. Yana 13 bahsda g‘olib nomi aniqlanmagan. To‘plar nisbatidagi ko‘rsatkich esa mehmonlar foydasiga ishlamoqda. “Qizilqum” 39 ta gol urgan, “Mash’al” esa 42 ta.

Darvoqe, “Mash’al” jamoasi Navoiyda oxirgi marta 2015 yilgi mavsumda g‘alaba qozongan. O‘shanda muborakliklar mehmonda 2:3 hisobidagi g‘alabani rasmiylashtirgandi. Shundan buyon “Mash’al” “Qizilqum” maydonidan quruq qo‘l bilan qaytyapti.

O‘tgan yilgi natijalarga kelsak, birinchi davrada “Mash’al” maydonidagi to‘qnashuvda 1:1 hisobi qayd etilgan, Navoiydagi o‘yinda maydon egalarining qo‘li baland kelgan – 1:0.