Машҳур юлдуз шартномани бекор қилди

Европа “Ливерпуль”, “Барселона” ва “Бавария”даги ўйинлари билан танилган бразилиялик плеймейкер Филиппе Коутиньо фаолиятини ўз юртида “Васко да Гама” жамоасида давом эттираётгани эди.

33 ёшли футболчи клуб билан келишувини муддатидан олдин якунлашга қарор қилди. Шартнома бекор қилинганини Коутиньо ижтимоий тармоқлардаги ўз саҳифасида ёзди.

Клуб маълумотига кўра, келишувни бекор қилиш ташаббуси футболчининг ўзидан чиққан. Бу қарор яқиндаги ўйиндан кейин қабул қилинган, ўша ўйинда мухлислар ярим ҳимоячини ҳуштакбозлик билан қарши олган.

Танаффусда алмаштирилгандан кейин Коутиньо захира ўриндиғига қайтмаган ва кейинчалик ижтимоий тармоқларда хайрлашув баёнотини эълон қилган.

Клуб баёнотида шундай дейилади:

“Ўзаро ҳурматли ва очиқ мулоқотдан сўнг томонлар шартномани бекор қилиш бўйича ўзаро мақбул келишувга эришдилар.

Академия битирувчиси сифатида Коутиньо “Васко”нинг ёшлар тизимининг барча босқичларидан ўтган ва жаҳон футболидаги фаолияти давомида ҳамиша ушбу клуб руҳига содиқ бўлиб келган.

Фаолияти бошланган жамоасига қайтгач, у профессионаллик, садоқат ва клубга чуқур ҳурматини кўрсатди ва майдондаги ҳар бир лаҳзада “Васко” футболкасига эҳтиром намойиш қилди”.

Жорий мавсумда Коутиньо “Васко да Гама” сафида 7 та ўйинда иштирок этиб, 3 та гол урди ва 1 та ассист амалга оширди.