Карантин ҳолатида ўқувчиларимизга янада қизиқарли лойиҳаларни тақдим этиш истагида “Дебют” рукнини ташкил қилдик. Бунда замонамизнинг энг яхши профессионал боксчилари ва ММА усталарининг илк жангларини эътиборингизга ҳавола этиб борамиз. Илк “қаҳрамонларимиз” эса, бокс ҳамда ММА оламининг “тирик афсона”лари Майк Тайсон ҳамда Фёдор Емельяненко бўлади.

Профессионал боксни Майк Тайсонсиз тасаввур қилиш қийин. Гарчи, у фаолиятидаги энг муҳим жангларда Леннокс Льюис ва Эвандер Холифильддан мағлуб бўлган бўлса-да, барибир мухлислар уни  бокс тарихида Муҳаммад Алидан кейинги шахс сифатида билишади ва ардоқлашади.

Кас Д’Амато топилмаси профессионал боксдаги юришини қандай бошлаган эди? “Темир Майк”  1985 йил 6 март куни Пуэрто Рико вакили Эктор Мерседесга қарши дебют жангини ўтказади ва уни биринчи раунднинг ўзидаёқ техник нокаутга учратади. Шу тарзда Майк, кейинчалик шуҳрат қозонган профессионал бокс оламига қадам қўяди.

ММА оламининг ҳам муболаға бўлмаса, ўз Тайсони бор... Уни “Сўнги Император” деб ҳам аташади. Ҳа, сиз янглишмадингиз, бу россиялик Фёдор Емельяненкодир. “Дебют” рукнининг илк сонида бу икки спортчига бежиз тўхталмадик. Чунки, булар ҳар қандай ҳолатда ҳам мухлислар назаридан четда қолмаган. Яъни фаолиятидаги мағлубиятлар, кўнгилсиз ҳодисалар, хурмача қилиқлар( бу Тайсонга тааллуқли) ҳам уларга бўлган ҳурматни сўндирмайди...

Фёдор ММА даги дебютини 2000 йил 21 майда нишонлайди. Ўша вақт Япониянинг “Ring» промоушени билан шартнома тузган россиялик жангчи, эркин кураш бўйича Болгария чемпиони Мартин Лазаров билан тўқнаш келади. Мазкур қарама-қаршиликда кейинчалик ММА оламида ўзига хос тарих ярата олган Емельяненко биринчи раундда оғриқли усулни қўллаган ҳолда ғалаба қозонади.