"Майли, насибамиз шу ерда экан, бу очилмаган қирраларимни очиш учун имконият" ёхуд "Насаф"дан кетган футболчи легионерга айланди

Яқинда яна бир ҳамюртимиз легионер мақомига айланди. Гап шундаки, бир неча мобайнида “Насаф” шарафини ҳимоя қилган дарвозабон Азамат Соибов эндиликда ўз омадини Қозоғистон бириничилигида синаб кўради.

Ҳамюртимиз биринчи дивизион вакили – “Арис” жамоаси билан шартнома тузди. Шундай қилиб, унинг легионер сифатидаги қозоқ чемпионатидаги фаолияти бошланди.

Қозоғистонга йўл олиши қандай юз берди?

"Жиззахлик танишим бор эди, у менга Қозоғистон вариантини таклиф қилди. Клубдагилар менинг ўйинларим видеосини кўришди, чақиришди ва шартнома бердилар. Ўзимиздан ҳеч қайси жамоа чақирмади, ёрдам беришмади. Майли, насибамиз шу ерда экан".

“Арис” клубидаги шароитлар қандай?

"Бу ердаги шароитлар ёмон эмас, чидаса бўлади. Лекин жамоада ўзимни яхши томонлама кўрсатсам, Қозоғистон олий дивизионидаги жиддий мақсади бор клублардан бирига ўтиш ниятим бор. “Арис”да ҳам мураббийлар сени ўйнатамиз деб, ёрдам беришларини айтишяпти. Келганимга 10 кунча бўлди. Аста-секин кўникяпман, олдимизда 12 та ўйин қолган".

Соибов кучлилигини исботламоқчи

"Худога шукр, ўзимни яхши ҳис қиляпман. Қачон менга имконият берилса, ўшанда ўзимни нимага қодирлигимни ҳаммага исботламоқчиман. Дўстларим мени қандай эканимни билишади. “Насаф”даги дарвозабонлар – Абдувоҳид Неъматов ва Умиджон Эргашев, шунингдек, у ердаги мураббийимиз Аслиддин ака ҳам. Менга ишонганлар ўшалар. Юзим ёруғ бўлиб, кейинчалик четга ҳам кетиш ниятим бор".

Футболчимиз учун бу олдинга ташлаган қадамми?

"Буни олдинга қадам ташлаш деб ўйламайман. Мен шунчаки 5 йил битта жойда қотиб қолдим. “Насаф”да менга ишонч билдирилмади. Яхши вариантлар бўлганида эса мени қўйиб юборишмади. Улар билан чиройли тарзда хайрлашиб кетдим. “Насаф” жамоасига раҳмат айтаман. Шунча йил у ернинг нон-тузини едик. Қозоғистонга келишим, очилмаган қирраларимни очишим учун имконият деб ўйлайман. Ўйнамаганимга анча бўлганди. Энди ўзимни кўрсатмоқчиман".

Қайси рақамни олди?

"Шартномага қўл қўяётганимда қайси рақамни олмоқчилигимни сўрашди. Уларга менга фарқи йўқлигини айтдим. Кейин менга 77-рақамни беришди. Олдинлари баъзида Қозоғистон чемпионатидаги ўйинларини кўрганимда кўпинча жисмоний тайёргарликка таяниларди. Европа футболига яқин ўйнашади. Ўзбекистонда эса техник футбол намойиш этилади. Бу ерда анча ривожланган. Футболчиларни қандай реклама қилиш ҳам кучайиб боряпти. Охирги пайтларда Қозоғистон терма жамоаси яхши натижалар қайд этяпти".

Шуҳратбек Жўраев.