Мбаппе Ҳусановнинг жамоасини тилга олди

Ўзбекистонлик футбол ишқибозлари Абдуқодир Ҳусанов ўйнаётган “Манчестер Сити”га мухлислик қилишини инобатга олиб, sports.uz портали ушбу клубга оид қизиқарли маълумотларни ўқувчилар эътиборига ҳавола қилишни давом эттиради.

Франция терма жамоаси ва “Реал” клуби етакчиси Килиан Мбаппе Англия Премьер-лигасининг янги мавсумида чемпионлик учун кураш қайси жамоалар ўртасида кечиши ҳақида ўз фикр-мулоҳазаларини билдирди.

- Чемпионлик ҳақида гапирганда, албатта, биринчи бўлиб “Ливерпуль”ни таъкидлаш лозим. Чунки улар совринларни кетма-кет ютишни мақсад қилган.

Лекин мен “Арсенал”нинг чемпион бўлишига ҳам катта умид боғлаганман. “Канонирлар”нинг аксарият ўйинчилари узоқ вақтдан бери бирга ўйнамоқда ва бир бирларининг имкониятларини жуда яхши билади. Бу футболчи муҳим аҳамият касб этадиган омиллардан ҳисобланади.

Хўш, ким чемпион бўлади? Ҳозирдан айтиш қийин. Балки “Арсенал”дир. Бу мавсум уларники бўлиши мумкин. Бироқ бу борада “Манчестер Сити” ёки “Ливерпуль” чемпион бўлади, дейиш ҳақиқатга яқинроқ, - деди Килиан Мбаппе.

Таъкидлаш жоизки, Килиан Мбаппе етакчилигидаги “Реал” Европа Чемпионлар лигаси янги мавсумида “Манчестер Сити” билан куч синашади. Бу учрашув 10 декабрь куни “Сантьяго Бернабеу” стадионида ташкил этилади.

Ўтган мавсум бу икки жамоа 1/8 финалга чиқиш учун ўтказилган плей-оффда ўзаро тўқнаш келган ва ўшанда икки ўйин натижасига кўра, “Қироллик клуби” вакиллари кейинги босқичга йўл олганди. Ўша беллашувда Абдуқодир Ҳусанов “Манчестер Сити” сафида энг яхши ўйин кўрсатган футболчилардан бири сифатида эътироф этилган эди.

“Манчестер Сити” қишда ҳимояни мустаҳкамлайди

Англия Премьер-лигасининг дастлабки учрашувларида Хосеп Гвардиола жамоасида ўнг қанот ҳимояси энг нозик нуқта экани кўриниб қолди.

Энди бу позицияда ўйнаб келаёган Матеуш Нуньеш ва Рико Льюис бор маҳоратларини ишга солиб, асосий таркибдаги ўрни учун курашишига тўғри келади.

Manchester Evening News нашрининг маълум қилишича, Хосеп Гвардиола қишки трансферлар ойнаси очилиши билан ўнг қанот ҳимоясига бошқа ўйинчи олиб келишни мўлжаллаяпти.

Манбага кўра, “шаҳарликлар” бу позицияни мустаҳкамлаш учун яна Тино Левраменто номзодига қайтган. Манчестерликлар ёзда ҳам Тинога қизиқиш билдирган эди.

Аслида “Челси” тарбияланувчиси бўлган 22 ёшли футболчи 2021 йили “аристократлар” сафини тарк этиб, “Саутгемптон”га қўшилган эди. Ливраменто 2023 йилнинг ёзида “Ньюкасл Юнайтед” таклифини қабул қилиб, ҳозирга қадар шу жамоада ўйнаяпти.

Transfermarkt портали экспертлари ҳар икки қанотда ўйнай оладиган Ливраментони 40 миллион еврога баҳолаган.

Эслатиб ўтамиз, асли марказий ҳимоячи бўлган Абдуқодир Ҳусанов ҳам ҳар икки қанотда ишончли ҳаракат қила олади. Сўнгги маълумотларга қараганда, Хосеп Гвардиола қишки трансферлар ойнаси очилгунга қадар айрим учрашувларда ўзбек легионерини ўнг қанот ҳимоясида ўйнатишни мўлжаллаяпти.