Мбаппе жамоа танлашда хатога йўл қўйганини тан олмади

«France Football» нашрига берган интервьюсида Килиан Мбаппе «Пари Сен-Жермен» таркибидан кетганидан сўнг Париж клубининг Европа Чемпионлар лигасида қаторасига икки марта ғолиб чиққанини, шу билан бирга у келганидан бери «Реал Мадрид» ҳали бу мусобақада соврин ололмаётганини шарҳлади. 

Ҳужумчи бу борада очиқ гапирди.

«Улар ютиб қўйишди, буни ҳеч ким инкор қила олмайди, уларни табриклайман. Ғалабаларини ўзлари қура олишди. Иккинчи марта кетма-кет чемпион бўлишди — бу ҳақиқатан ҳам ажойиб натижа. Ҳозир улар — ағдариш керак бўлган жамоа. Биз, «Реал», ва бошқа барча клублар икки марта ғолиб чиққан жамоани мағлуб этишни ўйлаб майдонга чиқяпмиз», — деди Мбаппе.

Футболчи вазиятни футболдаги табиий алмашинув, яъни цикллар билан изоҳлади:

«Мен ПСЖдаги ўз циклимни якунладим. Клуб эса янги босқични бошлади: асосий таркиб учун беш нафар футболчини олишди — Пачо, Невеш, Дуэ, кейин қишда Кварацхелия келди. Бу янги цикл менинг сўнгги мавсуимдаёқ бошланган эди. 

Луис Энрике билан Чемпионлар лигаси ярим финалигача етдик, «Боруссия Дортмунд»га қарши ўйнадик, финалга бир қадам қолганди, демак, уч йил кетма-кет финалга чиқиш имконияти бор эди. Улар учун бу шунчаки янги босқичнинг иккинчи йили эди», — дея таъкидлади у.

Мбаппе ўз қарорини яна бир бор ойдинлаштирди:

«Бутун умримни Лига 1да ўтказишни тасаввур қилмаганман. Орзумни амалга ошириб, «Реал» сафида ўйнашни истадим. Дунёдаги энг нуфузли клубга ўтиш ҳеч қачон хато қарор бўлмайди», — деди ҳужумчи.