Мбаппе Роналдуга гол уришни кўрсатиб қўйди

Европа Чемпионлар лигаси умумий босқичининг иккинчи турида Мадриднинг “Реал” жамоаси Қозоғистон чемпиони !Қайрат” меҳмони бўлиб, рақиб устидан 5:0 ҳисобида зафар қучди.

Учрашувда хет-трик қайд этган Килиан Мбаппе шу куни қитъанинг энг нуфузли турнирида урган умумий голлари сонини 60 тага етказиб олди. Франциялик ўйинчига бу натижани қайд этиш учун 88 та учрашув кифоя қилди.

26 ёшли ҳужумчи бу кўрсаткич бўйича Криштиану Роналдуни ортда қолдирди. Португалиялик юлдуз Чемпионлар лигаси 60 та гол уриш учун 98 та ўйинда тер тўкишига тўғри келган.

Чемпионлар лигасида Мбаппедан тез 60 та гол урган икки футболчи бор. Лионель Месси ўз даврида 80 та учрашувда 60 та тўп киритган бўлса, Роберт Левандовски бу ишни 85 та ўйинда уддалаган.

Эслатиб ўтамиз, Килиан Мбаппе 2024 йилнинг ёзидан бери “Реал” шарафини ҳимоя қилиб келмоқда ва шу пайтга қадар барча турнирларда 68 та учрашувда қатнашиб, ўз ҳисбига 57 та гол ва олтита ассист расмийлаштириб қўйишга улгурди.