Men Endrikdan noroziman!

“Real” qishki transferlar davrida jamoa asosiy tarkibiga kira olmagan braziliyalik hujumchi Endrikni Frantsiya chempionati vakili “Lion”ga ijaraga yuborgan edi.

19 yoshli futbolchi “Lion”dagi faoliyatini yorqin boshlagan bo‘lsa-da, keyinchalik o‘yinida pasayish kuzatilmoqda.

“Lion” bosh murabbiyi Paulu Fonseka ham Endrikni tanqid qildi.

- Men Endrikning o‘yinidan noroziman. U Braziliyadan qaytgach charchagani pand beryapti. Endrik yaxshiroq natija ko‘rsatishi shart, u jamoamizga kerakli o‘yinchi, - dedi Paulu Fonseka.

Joriy mavsumda braziliyalik legioner 15 o‘yinda 6 ta gol va 5 ta assist qilgan. Transfermarkt portali ma’lumotiga ko‘ra, uning qiymati 35 million yevroni tashkil qiladi.