Месси: "ЖЧдан кейин кўп нарсаларга аниқлик киритаман"

Аргентина терма жамоаси ва ПСЖ клуби ҳужумчиси Лионель Месси Венесуэлага қарши ўйиндан кейин ўз фикрлари билан ўртоқлашди. Айтишича, Лео Қатардаги мундиалдан сўнг фаолиятига оид муҳим қарор чиқаради.

"Очиғи, олдинда мени нималар кутиб турганини билмайман. Ҳозир Эквадорга қарши ўйин, июнь ва сентябрь ойидаги тайёргарлик йиғинлари ҳақида ўйлаяпман.

Жаҳон чемпионати яхши ёки ёмон ўтишидан қатъий назар мен кўп нарсаларни қайтадан кўриб чиқмоқчиман. Бу фаолиятимдаги муҳим қарорларимдан бири бўлади.

Аргентина ҳақида гапирадиган бўлсам, бу ерда ажойиб жамоа шаклланган. Одамлар ҳам мени яхши кўради. 

Ҳар сафар юртимга келганимда, мен одамлардан миннатдор бўлиб қайтаман. Улар мени ҳар қандай ҳолатда қўллаб-қувватлаб туради. Айниқса, Копа Америкадаги чемпионликдан сўнг бу эътибор янада кучайди", - деди аргентиналик афсона.