Месси кимлардан “қарздор” эканини айтди

Саккиз карра “Олтин тўп” соҳиби Лионель Месси профессионал фаолиятини йўлга қўйишида унга кимлар кўмаклашгани ва таъсир ўтказгани ҳақида гапирди.

Маълумки, аргентиналик юлдуз фаолиятининг асосий қисми “Барселона”да ўтган. 2021 йили Месси Каталонияни тарк этишига тўғри келди. Кейинчалик икки мавсум ПСЖда тўп тепди ва 2023 йили ёзда “Интер Майами”дан қўним топди.

- Мен ҳар доим таъкидлаб келганимдек, биринчи кирган кийим алмаштириш хонаси жуда бошқача бўлган. Ўшанда Роналдиньо, Деку, Силвиньо, Хави, Иньеста ва Пуйоль мени қандай кутиб олишганини ҳали ҳамон унута олмайман.

Номдор ўйинчилар бор эди, жамоа ҳақиқатан афсонавий эди. Биз узоқ йиллик танаффусдан кейин илк бор Чемпионлар лигасида ғолиб чиқдик.

Бош мураббий Франк Райкард менга ишонч билдириб, жамоанинг бир бўлагига айлантиргани ажойиб иш бўлган. Мен ҳақиқатан футболдан роҳат олардим, - деди Лионель Месси.

Эслатиб ўтамиз, Лионель Месси “Барселона”даги дебютини 2003 йилнинг 16 ноябрь куни “Порту”га қарши ўртоқлик учрашувида нишонлаган.