Месси “Реал” афсонасини роса мақтади

Лионель Месси “Барселона”нинг азалий рақиби – “Реал”нинг афсонавий дарвозабони Икер Касильяснинг фаолиятини якунлаганига муносабат билдирди.

- Икер фаолиятини ҳозир якунлаётган бўлса-да, футбол тарихидан анча йиллар муқаддам муқим жой олиб бўлган. Бу Ла Лигада энг зўр дарвозабон бўлганидан эмас, балки халқаро миқёсда барча совринларга эга чиққанидан, - деди Месси.

Шунингдек, Лео Касильяс дарвозасини ишғол қилишга қийналганини ҳам тан олди.

- Икер сен зўр дарвозабонсан, сенга қарши ўйнаш қийин бўлганини тан оламан. Ортга қараб, рақобат қилган пайтларимиз ҳар гал ўз имкониятларимизни ошириб боришга хизмат қилганини англайман, - деди “Барселона” сардори.

Ўз навбатида, жаҳон ва Европа чемпиони, Чемпионлар лигаси ғолиби бўлган Икер Касильяс аввалдан Лионель Месси ҳақида доим яхши фикрларни билдирган. У аргентиналик тўпурарни ўзига қарши ўйнаган энг зўр футболчи, деб ҳисоблаган.