"Metallurg" etakchisini xorijda kutishyapti! Uning o‘zi yangi chaqiruv, rejalar va jamoasi haqida nima deydi?

Ikkinchi davrani yaxshiroq o‘tkazayotgan “Metallurg” klubi turnir jadvalida 7-o‘ringa ko‘tarilib oldi. Ayniqsa, oxirgi ikkita turda bir xil – 1:0 hisoblarida g‘alaba qozondi. Undan oldin esa durang o‘ynagan. Aytmoqchimizki, bekobodliklar hamon boshqalar uchun noqulay raqib ekanligini ko‘rsatib kelishmoqda.

O‘tgan yili “Qo‘qon-1912” sharafini himoya qilib, bu yil “Metallurg” jamoasida ko‘rinish bergan yarim himoyachi Farhod Bekmurodovni mazkur klubda o‘rni katta. U himoya bilan hujumni bog‘lashda katta hajmdani ishni bajarib kelmoqda. “Neftchi”ga qarshi bahsdan keyin Bekmurodov ayrim savollarga javob qaytardi.  

- Farhod, “Neftchi” ustidan erishgan g‘alaba bilan tabriklayman! Ayting-chi, o‘yin sizda qanday taassurot qoldirdi? Dastlab shu haqida to‘xtalib o‘tsangiz.

- Tabrik uchun rahmat. Yaxshi o‘yin bo‘ldi. Bilasiz, “Neftchi” ham 2-davrani bizga o‘xshab yaxshi o‘tkazyapti. Bu o‘yinni yutishimiz shart edi. Chunki 1-davradagi uchrashuv natijasi tasodif ekanligini isbotlashimiz kerak edi. Tayyorgarlikni ham shunga yarasha olib bordik. Xudoga shukr, g‘alaba qozonib, hammani xursand qildik.

- Bu yil ilk bor ispaniyalik bosh murabbiy Luisma Ernandes bilan ishlayapsiz. Uning boshqa murabbiylardan farqli tomonlarini ko‘rdingizmi?

- Ha, ispaniyalik murabbiy bilan birinchi marta ishlayapan. Hamma murabbiyning futbolga o‘ziga xos qarashlari bor. Uning ham o‘z taktikasi bor. Tartib-intizomni birinchi o‘ringa qo‘yadi.

- Siz "Metallurg"da jamoa sardoriga aylana oldingiz. Bu qanday yuz berdi va sardorlik bog‘ichidan keyin o‘zingizda qanday o‘zgarishlarni sezyapsiz?

- Aslida jamoamiz sardori Abbos Otaxonov edi. Ammo kutilmaganda jarohat olib safdan chiqdi. Shuning uchun men jamoamni sardor sifatida olib chiqyapman. Albatta, sardorlik bog‘ichining mas’uliyati kattarok bo‘ladi, buni bilaman. Chunki 2020 yilda “Andijon” jamoasida ham sardor bo‘lganman.

- "Metallurg"da o‘yinchi sifatida tajribangiz ancha oshdi. Eshitishimcha, sizga chetdan ham qiziqarli takliflar bo‘lmoqda va bu qanchalik qiziqtirmoqda? Legioner sifatida chetda to‘p surish rejangiz bormi?

- Ha, shunday. Ancha tajriba oshirdim. Bunga sabab jamoadoshlarimiz juda zo‘r. Buning ustiga jamoada ichki muhit a’lo darajada. Rahbariyatdan tortib oddiy ishchigacha hamma professional. Shu omil ham o‘sishimga katta yordam beryapti. Takliflar bor, yashirmayman. Lekin hozir bu haqida gapirishga erta. Oldinda yana 3 ta o‘yinimiz bor. Shularni o‘tkazib olaylik, keyin bafurja o‘ylab ko‘ramiz.

- Xo‘sh, qaerdan takliflar bo‘lyapti?

- Indoneziya va Malayziyadan!

- Umuman olganda, joriy mavsumda "Metallurg"ning oldiga qo‘yilgan maqsad qanday edi va bunga qanchalik erishyapmiz, deb o‘ylaysiz?

- Maqsad iloji boricha yuqori o‘rinni egallash. Har uchrashuvda g‘alaba qozonib, muxlislarni xursand qilish vazifamiz va bunga erishyapmiz, deb o‘ylayman.

- "Metallurg" ko‘p klublar uchun noqulay raqib hisoblanadi. "Metallurg" uchun qaysi jamoa noqulay?

- “Metallurg” uchun bu yil “Nasaf” noqulay bo‘ldi. 2-davrada o‘z uyimizda 0:2 hisobida mag‘lub bo‘ldik.

- Eshitishimcha, "Metallurg"da tashkiliy ishlar yaxshi yo‘lga qo‘yilgan va qarzdorlik mavjud emas ekan, shu rostmi?

- Ha, yuqorida aytganimdek, hamma professional. O‘z ishiga mas’uliyat bilan yondashadi. Albatta, qarzdorlik umuman yo‘q. Sharoitlar a’lo darajada.