“Монако”нинг бирданига икки трансфери барбод бўлди

Франциянинг “Монако” клуби ҳужумчиси Фоларин Балогуннинг “Эвертон”га трансфери якуний босқичда барбод бўлди. Бу ҳақда журналист Фабрицио Романо хабар берди.

Манбага кўра, француз клуби битим бекор қилингани ҳақида аллақачон маълумот олган.

Вазият Ламин Камаранинг “Челси”га трансфери билан бевосита боғлиқ.

Аввалроқ Лондон клуби “Монако” билан сенегаллик ярим ҳимоячини 55 миллион евро эвазига харид қилиш бўйича оғзаки келишувга эришган эди.

Бироқ Балогунни сотиш бўйича келишувга эришилганидан кейин монегасклар ўз режаларини қайта кўриб чиқди ва Камара бўйича келишувдан воз кечиб, футболчини жамоада олиб қолишга қарор қилди.

Кўп ўтмай, Балогуннинг “Эвертон”га трансфери ҳам амалга ошмай қолди.

Шундай қилиб, “Монако” сўнгги лаҳзада бирданига иккита трансфер қароридан воз кечди: Камара жамоада қолади, Балогуни эса “Эвертон”га сотилмайди. Ҳужумчи трансферининг бекор қилиниши сабаби ҳозирча маълум эмас.