Легионеримиз клуби чемпион "Зенит"ни ҳақоратда айблади ва расмий узр сўрашни талаб қилди
Питерликлар хато қилиб қўйди
Махачқалъадаги «Динамо» клуби Санкт-Петербургнинг «Зенит» жамоасидан Россия чемпионати 12-туридаги ўзаро учрашув олдидан эълон қилинган эпиграмма матни учун расман узр сўрашни талаб қилди.
Клуб баёнотида айтилишича, матнда ишлатилган «соқоллар тагигача қиртишланган» ва шамол «папахаларни учириб юборган» деган жумлалар ҳақоратли, деб баҳоланган.
«Бу ибораларни биз мутлақо мақбул эмас, деб ҳисоблаймиз. Ҳар бир сўзнинг ўз қиймати бор, айниқса уни мамлакатнинг энг йирик клубларидан бири кўп миллионлик аудитория олдида айтганида», — дейилади Махачқалъанинг «Динамо» клуби расмий мурожаатида.
Кейинчалик «Зенит» ушбу эпиграмма матнини ўзининг ижтимоий тармоқлардаги саҳифаларидан олиб ташлади.
«Зенит» — Махачқалъадаги «Динамо» учрашуви якшанба, 25 октябрь куни «Газпром Арена» стадионида бўлиб ўтади. Ўйин Тошкент вақти билан соат 20:30 да старт олади.
Россия чемпионатида 11 турдан сўнг мусобақа жадвалида 25 очко тўплаган Москва «Динамо»си пешқадамлик қилмоқда. Ундан бир очкога орқада, 24 балл билан, амалдаги чемпион — Санкт-Петербургнинг «Зенит» жамоаси бормоқда.
Испаниялик мутахассис Хуан Карседо бошқарувидаги «Спартак» етакчидан икки очкога ортда қолган ҳолда учинчи поғонада жойлашган. ЦСКА эса кучли тўртталикни якунлаб турибди.
Махачқалъанинг «Динамо» жамоаси ҳозирча 13 очко билан турнир жадвалида тўққизинчи ўринни эгаллаб турибди.
Эслатиб ўтамиз, махачқалъаликлар таркибида жорий чемпионатда ўзбекистонлик лигеонер Маҳмуд Маҳамаджонов тўп тепмоқда. Сентбярь ойида «Андижон»дан Россия чемпионатига кўчиб ўтган 23 ёшли футболчимиз «Динамо» билан 2029 йилнинг ёзигача давом этадиган шартнома имзолаган.
Ўзбекистон миллий терма жамоаси ҳимоячиси Махачқалъа клуби таркибига ўтганидан кейин асосий таркибдан муқим жой олди ва ҳозиргача Премьер-лига ва мамлакат кубогида олтита ўйин ўтказди.
Изоҳлар (0)