Моуриньо Португалияни бошқаришга рози бўлди, фақат битта шарти бор

Португалия терма жамоаси жаҳон чемпионати ярим финалига чиқа олмаганидан кейин янги бош мураббий тайинлаш долзарб масалага айланди.

Ҳозирги мураббий Фернанду Сантушнинг амалдаги шартномаси 2024 йилгача тузилган. Бироқ, экспертлар бу мутахассис тез орада истеъфога чиқарилишини таъкидлашмоқда.

Португалия футбол федерацияси терма жамоага  “Рома”ни бошқараётган Жозе Моуриньони тайинлаш масаласини ҳам кўриб чиқмоқда. Voetbal International нашрининг маълум қилишича, Жозе Моуриньо ўз юрти термасида ишлашга қарши эмас, лекин федерация олдига шарт қўймоқда.

Маълумотларга қараганда, 59 ёшли мутахассис Португалия терма жамоасини қабул қилиб олиш баробарида “Рома”даги ишини давом эттирмоқчи. Унинг римликлар билан шартномаси якунланишига яна бир ярим йил бор.

Португалия футбол федерацияси ҳали Моуриньо талабига муносабат билдиргани йўқ.