Моуриньо "Тоттенхэм"га нима бермоқда? Артета "Арсенал"ни қутқара оладими... ёхуд АПЛда вазият қандай?

Янги йил арафасида Англия чемпионатида рўй берган ва юзага келган энг қизиқарли вазиятлар борасида тўхталиб ўтамиз.

"Ливерпуль" борасида бир фикр билдиришнинг ўз ортиқча. Сабаби, ушбу жамоа жуда жуда юқори савияда ўйнаб келмоқда ва ортда қолган 17 та турнинг бирортасида ҳам мағлубиятга учрамади. Клублар ўртасидаги жаҳон чемпионатида Мексиканинг "Монтеррей" клубидан сўнг, финалда "Фламенго"ни қўшимча бўлимларда мағлуб этишни уддасидан чиқди. Кўпчилик, инглизлар учрашувнинг асосий дақиқасида масалани ҳал этишларини тахмин қилганди.

Брендан Рожерс қўл остидаги "Лестер" жамоаси ушбу мавсумда ҳам жуда юқори савияда ўйнаб келмоқда.

Раньери даврида чемпионга айланган жамоани бошқа юқорига кўтарилмаслигини ва натижалари пасайиб кетишини, умуман бу бир мавсумли клуб эканлигини таъкидлаганлар бисёр эди. Устига-устак, Канте, Марез каби юлдузлар жамоани тарк этишганди. Жамоа тўпурари Жейми Варди ҳамон клубда ўз фаолиятини давом эттирмоқда ва жорий мавсумнинг 17-туридан сўнг, 17 та гол билан АПЛ тўпурарлари орасида етакчи бўлиб турипти. Куни кеча, "Лестер" "Манчестер Сити"га имкониятни бой бериб қўйди.

Шундай бўлсада, иккинчи ўриндан тушиб кетмади. Умуман олганда, "Лестер" жорий мавсум ҳам 2015/16 йилги мавсум каби юқори савияда ўйнаб келмоқда. Агар "Ливерпуль" барча ўйинларини ғалаба билан якунламаганида ёки шу жамоа йўқ бўлганида "Лестер"да чемпионлик учун яна имконият бўларди. Жамоа чемпион бўлган йили ҳам 17-турдан сўнг, 38 очко билан турнир жадвалида етакчилик қилаётганди.

Гвардиола устозлик қилган жамоа унча-мунчага осонлик билан таслим бўлмайди. Унинг жамоаси доим фаворит бўлиб келган. Бироқ, жорий мавсум "Ман Сити" "Ливерпуль"га ютқазди ва чемпионлик учун бўлган курашда, анчагина ортда қолиб кетди. Футбол шайдоларининг каттагина қисми Клопп бошқарувидаги жамоани чемпионга чиқариб бўлишди. Буниси ҳам етмаётгандек, "Ман Сити" "Лестер"ни ҳам ўтказиб юборган ва учинчи ўриндан жой топган, аммо юқорида таъкидлаганимиздек, "Манчестер Сити" "Лестер"ни таслим этишни уддасидан чиқди ва орадаги очколар фарқи энди 1 тани ташкил этмоқда ҳолос! Айрим мухлислар Гвардиола истеъфога чиқишини хоҳлашаяпти. Агар шунда бўлса, унинг ўрнига ким келади? Қайси мутахассис номзодини маъқул кўрасиз? Бу борада, Гвардиоладан муносиброқ номзодни топиш қийин. Балки, яхши кучли мураббийлар бордур, аммо уларнинг катта қисми ўз жамоаларида яхши ишлаб келишмоқда. Гвардиоланинг кетиши мумкинлиги борасида фикр билдиришнинг ўзи ҳам нотўғри бўлса керак. Сабаби, раҳбарият учун бу жуда катта таваккалчилик ва "Реал"га қарши ўйиндан олдин бундай ишга қўл урмаса керак.

Гоҳида, кутилмаган мағлубиятларни қабул қилиб олишга мажбур бўлаётган ва "Эвертон", "Борнмут" жамоаларига ютқазиб қўйгандан сўнг, "Челси" клуби "Тоттенхэм"ни таслим этишни уддасидан чиқди. Бу кўпчиликни ҳайрон қолдирди. Лэмпард футболнинг ҳақиқий мутахассиси эканлигини исботлаб қўйгандек бўлди. Жамоанинг асл мухлисларининг кайфиятларидан ниҳоятда бахтиёр эканликлари кўриниб турганди. Аввалги мавсумларни юлдуз футболчилар билан ўтказган лондонликлар жорий мавсумда кўплаб ёш иқтидорларга имкон бераяпти. Қайсидур маънода Лэмпарднинг бу услуби иш беряпти десак ҳам бўлади. ЧЛда гуруҳдан чиқди ва АПЛда тўрттинчи ўринни эгаллаб турипти.

"Тоттенхэм" ва МЮ эса кўп томонлама бир хил кўринишмоқда. АПЛда ҳам 6-7-ўринларни эгаллаб туришипти ва орадаги очколар фарқи бор-йўғи биттани ташкил этмоқда. Ўйин қуриш ва тактик услуб бир-бирига ўхшаш, аммо ижрочилар турлича. Ҳимоядаги хатолар ҳам иккала жамоанинг даражасига мос эмас. Асосан, футболчиларнинг маҳоратлари эвазига натижаларга эришилмоқда. "манчестер Юнайтед"га гоҳида Рэшфорд, "Тоттенхэм"га эса Сон, Кейн ёки Лукас каби футболчилар натижа келтирмоқда. Икки жамоанинг орасидаги фарқ шундаки, бири ЧЛдаги юришини давом эттираётган бўлса, иккинчи Европа Лигаси плей-офф йўлланмасини қўлга киритган. Лондон клубига Жозе Моуриньо бош мураббий этиб тайинлангани мухлисларга катта умидларни берди, аммо 22 декабрь куни "Челси"га қарши кечган учрашувда ушбу мутахассис ҳам ёрдам беролмай қолди. МЮ эса кутилмаганда аутсайдер бўлиб турган "Уотфорд"га ютқазиб қўйди. Сульшер ва Моуриньо шогирдларининг қарама-қаршилигида Рэшфорднинг дубли МЮга 2:1 ҳисобидаги ғалабани тақдим этганди.

"Арсенал" осмонида эса "қора булутлар" пайдо бўлган. АПЛдаги сўнгги 10 та учрашувда бор-йўғи бир маротабагина ғалабага эришолди. Микель Артета жамоага янги бош мураббий этиб тайинланди. Ана энди мухлислар ўзгаришларни кутишади ва умид қилишади. Бироқ, бу ҳам катта фойда келтиришига ишониш жуда қийин. Клубнинг муаммолари кўпайиб кетган, боз устига, жамоанинг бир қатор футболчилари кетиш пайига тушиб қолишди. Энг ачинарлиси, мана шундай қийин вазиятда етакчи футболчилардан бири Обамеянг ҳам ўзига янги жамоа қидиришни бошлаб юборган. Габонлик футболчи январь ойидаги трансфер ойнасида Лондон клубини тарк этиш эҳтимоли юқори.

Натижалари кескин даражада пасайиб кетган клублар 2-даврада вазиятни ўнглаб олишлари қийин бўлади. Чунки, АПЛда ҳеч бир жамоа осонликча таслим бўлмайди. "Вулверхэмптон" аллақачон грандларга бош оғриқ бўладиган жамоага айланиб улгурган. "Эвертон" жамоасига Анчелотти бош мураббий бўлди. "Лестер" ва "Вулверхэмптон" каби "Шеффилд Юнайтед" ҳам жуда самарали натижаларга эришмоқда. Турнир жадвалига эътибор берилса, мусобақа қизиганданда-қизиётгани кўриниб туради.

Янги йил арафасида ва январнинг бошида тур ўйинлари фақатгина АПЛда бўлиб ўтади. Шифокор, ҳайдовчи, тадбиркор, ҳунарманд ва ёйинки барча дам олса ҳам, АПЛда дам олишнинг ўрнига кетма-кет ўйинлар ўтказилади.