Моуриньо Туркия чемпионати обрўсини тўкди

Туркия чемпионатининг 34-турида Жозе Моуриньо бош мураббийлик қилаётган “Фенербаҳче” футболчилари ашаддий рақиб – “Бешиктош”дан 0:1 ҳисобида мағлубиятга учради ва амалда чемпионат пешқадами “Галатасарой”дан саккиз очкога орқада қолиб кетди.

Жозе Моуриньо шогирдлари “Галатасарой”га тенглаша олмаслигини тан олди. Португалиялик мутахассис мағлубиятдан кейин билдирган фикрлари орқали Туркия Суперлигаси обрўсига путур етказди.

- Бу учрашувда фақат битта жамоа ғалаба илинжида ўйнади ва бунинг учун вазиятлар яратди. Биз мағлубиятга лойиқ эмасдик.  VAR ва ҳакамлар қарорлари, Эн-Несирига пенальти берилмагани ва бошқа омиллар...

Мен бунақа нарсаларни гапириб чарчадим. Вазият ва ҳақиқат шу. Ҳеч нарса ўзгаргани йўқ. Агар сизнинг айрим ўйинчиларингиз яхши ўйнамаса, бу жамоангизга ҳам таъсир қилади.

Лиганинг якуний натижаси ҳали чемпионат бошланмасидан аниқ эди, - деди Жозе Моуриньо.