Бундан 8 йил олдин «Реал» клуби «Сан-Мамес»да «Атлетик» устидан 3:0 ҳисобида ғалабага эришган ҳолда мавсумдаги ёрқин нуқтани қўйишга эришганди ва ўз тарихида 32-бор Испания чемпионига айланганди.

Ўша 2011/12 мавсум бир қатор сабабларга кўра «Рекордлар Лигаси» сифатида ёдда қолган: «Реал» клуби рекорд даражада очко (100) жамғарган ва рекорда даражада гол (121) урган ҳолда чемпионга айланган. Бундан ташқари, мадридликлар уй ўйинларида (16 учрашув) рекорд даражада очко (51) жамғарганлар ва рекорд даражада гол (51) киритганлар.

Шак-шбуҳасиз, юқорида санаб ўтилган рақамларга қарамасдан, 2011/12 мавсум «Реал» ишқибозлари учун «Барселона»нинг уч йиллик ҳукмронлигига чек қўйилгани сабабли ҳам алоҳида аҳамият касб этади. Такрорланмас жамоалар, жаҳоннинг энг яхши футболчилари (Лионель Месси ва Криштиану Роналду), жаҳоннинг кучли мураббийлари (Жозе Моуриньо ва Хосеп Гвардиола), шунингдек, икки клуб таркибидаги 20 нафар жаҳон чемпионлари ўртасидаги афсонавий дуэль. Бугун, орадан 8 йил ўтиб «Бошқача мураббий» «Маrcа» нашрига берган интервьюсида ўша «Рекордлар Лигаси»ни хотирлаб ўтди.

- Карантина пайтида Лондонда қандай яшаяпсиз?

- Ростини айтсам, шу кунларда уйда ҳар қачонгидан ҳам кўра кўпроқ футбол томоша қиляпман. Таҳлил қиляпман, кўплаб жамоалардан ва мураббийлардан ўрганяпман. Футболни, ўзимизнинг дунёни соғиняпман, аммо ҳозир сабрли ва мулоҳазали бўлиш керак. Бу муаммо барчамизга даҳл қилди ва барчамиз ўз ролимизни ижро этишимиз шарт.

- Чемпионатнинг келган жойидан давом эттирилиши ҳақида қандай фикрдасиз?

- Агар чемпионатнинг қолган 9 ўйини ўтказиб қўйилса, бу барчамиз, футбол ва АПЛ учун яхши. Бу яхши белги.

- Ҳатто учрашувлар томошабинларсиз ёпиқ эшиклар ортида ўтса ҳамми?

- Менга футбол ҳеч қачон ёпиқ эшиклар ортида ўтмайди, деб ҳисоблаш ёқимли. Чунки телекамералар бор ва ўйинни миллионлаб томошабинлар кўради. Ҳатто агар бўш стадионларга чиқишимизга тўғри келса ҳам аслида улар бўш бўлмайди.

- Бошқарувингиздаги «Тоттенхэм» ўзининг янги стадиони «Уайт Харт Лэйн» эшикларини яқин атрофдаги шифохоналарнинг шифокорлари ва беморлари учун очган ҳолда «Covid-19»га қарши курашга қўшилди. Энди улар стадионда тикланишлари мумкин.

- Ҳа, бу ҳайратланарли. Сен оддий кунни, учрашувдан олдинги суҳбатларни, ўйиннинг кетишини тасаввур қиласан... Кейин эса стадионга келасан ва унинг нимага мўлжалланганлигини кўрасан. Бу ҳозирги вақтда жуда яхши қарор.

- Фаолиятингизнинг «Реал» бош мураббийи бўлган босқичи ҳақида гаплашамиз. 8 йил олдин сиз Ла Лигани ютгандингиз. Бу 2011/12 мавсумда юз берган, «Қироллик клуби» очколар ва голлар бўйича Испания рекордини янгилаганди. Сиз буни фаолиятингиздаги асосий муаваффақият деб ҳисоблайсизми?

- Бу энг асосий натижам бўлганми ёки йўқми, буни айтишим қийин. Аммо бу жуда муҳим давр бўлганига ишончим комил. Ахир биз «Барселона»нинг ҳукмронлиги даврида муваффақиятга эришганмиз. Биз уларнинг гегемонлигига чек қўйганмиз ва буни очколар ҳамда голлар сони бўйича рекорд натижа ўрнатган ҳолда амалга оширганмиз. Биз шунчаки Ла Лигани ютмаганмиз, буни шу тарзда амалга оширдикки, натижада тарихдан жой олдик.

- Шак-шубҳасиз Чемпионлар Лигаси ярим финалида «Бавария» билан ўйиндан кейинги пенальтилар серияси турнирдан ҳафсалангизни пир қилган...

- Худди шундай. Ўша мавсум «Реал» Испания ва Европанинг энг яхши жамоаси бўлган. Шу сабаб бизга Чемпионлар Лигасидан эрта чиқиб кетишни қабул қилиш қийин бўлган.

- Испанияда сиз таркибида Месси, Хави ва Иньеста сингари ижрочилари бўлган тарихдаги энг яхши «Барселона»га қарши тургансиз. Жамоани Пеп Гвардоила бошқарарди. Муваффақият калити нима бўлганди?

- Фикримча, асосийси биз ўзимиз энг зўри бўла олган ўйин услубини топа олганимиз бўлган. Биз ўз ўйинимизни шарт-шароитлар ва футболчиларнинг имкониятларига мос равишда қурганмиз. Албатта, шунингдек, футболчиларнинг улкан иқтидори ва ҳар бир учрашувда амалга оширган ишлари ҳал қилувчи ролни ўйнаган. Менимча, мана шу энг асосийси. Ҳамма бирлашган ва диққат-эътиборларини битта асосий мақсад – чемпион бўлишга қаратганди.

- Эслайсизми ёки йўқми, билмайман, аммо сентябрь ойида сиз осон бўлмаган даврни бошдан кечиргансиз: «Леванте»дан қабул қилиб олинган мағлубият, кейин «Расинг» билан дуранг. Мавсум стартида буни қандай енгиб ўтгансиз?

- Жамоанинг кучи эвазига. Биз энг яхшилари эканлигимизни ҳис қилганмиз ва шундай кайфиятда «Валенсия» ва «Севилья»га қарши учрашувларга, «Висенте Кальдерон», «Сан-Мамес» ва «Камп Ноу»даги баҳсларга чиққанмиз. Бу улкан иштиёқ бўлган, чунки биз ҳатто ўша стадионларда ҳам босимни ҳис қилмаганмиз.

- Кўпчилик ўшанда сизнинг жамоангиз бирлашган – бирорта ҳам ёриқсиз яхлит иттифоқ бўлганини тез-тез гапиришади...

- Шундай ҳам бўлган. Жамоа ўзининг футбол даражаси эвазига кучли бўлган. Шунингдек, иштиёқи эвазига ҳам – биргаликда бу икки жиҳат қойилмақом натижа берган.

- 26-турда «Ноу Камп»да кечган «Эль классико»да «Барселона»ни 1:2 ҳисобида мағлуб этгансизлар ва Ла Лиганинг 1-поғонасидан мустаҳкам жой олгансизлар. Ўша учрашувдан қандай хотиралар сақланиб қолган?

- Гўзал хотиралар. Биз «Барса»га қарши ўйнаганмиз ва бизни икки хил натижа қониқтирарди: ғалаба ёки дуранг. Ўша беллашувга яхши тайёрланганмиз. Шогирдларимга доимий равишда: «Биз учрашувни ўз фойдамизга ҳал қиламиз, ғалаба қозонамиз», - деб такрорлардим. Эҳтирослар ва босим «Барселона»да улкан даражада эди, чунки улар уйида ўйнашаётганди. Аммо биз уларни ўтиш даврида «синдира» олишимизни билардик. Улар ҳисобни тенглаштиришган пайтда шундай бўлди ҳам. Эҳтирослар ақл-идрокни йўқотди.

- Сиз «Реал»нинг юқори тезликдаги ўйини ва қарши ҳужумлари рақиблар учун даҳшатли бўлганини айтгансиз. Тактик нуқтаи назардан Ла Лигадаги ўша муваффақиятнинг асоси нимада эди?

- Ҳа, бу гапларимни яхши эслайман. Бизда муайян ўйин услуби бор эди. Ҳимоя чизиғида биз жуда ҳам уюшқоқ тарзда ўйнаганмиз, майдондаги барча ижрочилар нима қилишлари кераклигини билишарди. Катта ролни тартиб-интизом ва майдон ташқарисида ташкил этилган ишлар ўйнаган. Шунингдек, биз шиддатли ҳужумларни амалга оширганмиз, нишонга жуда тез ва тўппа-тўғри борганмиз. Ўйинни доимо дарвозадан бошлаганмиз, тўп оширишлар деярли бенуқсон бўлган. Қўл остимда бир жамоа сифатида ўйнаган аъло даражадаги футболчилар бор эди – охир-оқибат айнан шу муваффақиятнинг асосий сабаби бўлган.

- Барча Криштиану Роналдуни ўша «Реал» учун ўйинни белгилаб берадиган футболчи сифатида эслайди. Аммо мураббий нуқтаи назаридан футболчилардан айнан қайси бири ўйин услубини белгилаб берарди?

- Менга кимнидир ажратиб кўрсатиш ёқмайди, Криштиануни ҳам ёки яна бошқа кимнидир. Ҳар бир ўйинчи муҳим, чунки ҳар бирининг жамоада аниқ вазифалари бор эди. Барча учрашувларда ғалаба қозонишни, совринларни қўлга киритишни хоҳлаган ва «Реал» учун муҳим эканликларини билишган. Чунки ҳамма мақсадга эришиш учун борини беришаётганларини кўришган. Бу ҳақда гапирар эканман Хосе Кальехон билан Эстебан Гранерони эсга оламан, улар асосий таркиб ўйинчилари эмасди, бироқ улар биз учун керакли ижрочилар бўлган. Аслида, ўша «Реал» Ла Лига ва Чемпионлар Лигасидаги ғалабалар учун муносиб эди.

- Сиз ўзингиз ишлаган барча мамлакатларда миллий чемпионатни ютгансиз. Яқинда 2004/05 мавсумда «Челси» билан эришган дастлабки чемпионлигингизга 15 йил тўлди. Сиз АПЛда «Порту»даги ғалабали мавсумдан сўнг дебютингизни ўтказгансиз. Испаниядаги ўша «Рекордлар Лигаси» сиз учун ўзгача бўлганми?

- Агар Португалия чемпионатини бир четга суриб қўядиган бўлсак, бу шубҳасиз менинг шахсий хет-тригим бўлган. Мен Италия, Англия ва Испанияда муваффақиятга эришишни хоҳлаганман. Мен ҳозирча буни уддалаган ягона мураббийман. Футбол тарихидан шу тарзда жой олишни жуда ҳам истагандим, лекин шунингдек, «Реал»ни жуда яхши кўрардим ва мадридликлар билан мана шу муваффақиятга эришишни жуда хоҳлагандим.

- Ишқибозлар сизни «ҳимоявий» мураббийликда айблайдилар. Ла Лигада 121 та гол урган ҳолда чемпионликка эришганингиздан сўнг уларни аксинча эканлигига ишонтириш учун нимадир дея оласизми?

- Йўқ, мен ҳеч кимга ҳеч нима демайман... Тарих ёзиб бўлинди ва мен ундан кўра яхшироқ сўзлаб бера олмайман.