Мундиал стартига 27 кун қолди! Осиёда енгилмас жамоага айланиб улгурган, "ЖЧ-2022"дан четлатилиш арафасида турган Эрон ҳақида гаплашамиз

"ЖЧ-2022" стартига тобора оз вақт қолмоқда. SPORTS.uz кетма-кетлик билан сизни мундиалда иштирок этувчи термалар билан таништиришда давом этади.

Шу пайтгача биз Қатар, Эквадор, Сенегал, Нидерландия ҳамда Англия терма жамоалари билан сизларни таништириб ўтдик. Энди навбат "B" гуруҳидан ўрин олган ҳамда Осиёнинг энг кучли жамоаларидан бири ҳисобланган Эронга келди. Демак, бизга саралашларда доим бош оғриқ бўлиб келган форслар ҳақида батафсил гаплашамиз:

Эрон терма жамоаси, Эрон Ислом Республикаси Футбол Федерация (FFIRI)

Ташкил топган: 1920 йил (ФИФА'га 1948 йилда аъзо бўлган)
Бош мураббий: Карлуш Кейрош
Жамоа сардори: Эҳсан Ҳажсафи
Илк расмий баҳси: Афғонистон - Эрон 0:0 (1941 йил)
Энг йирик ғалаба: Эрон - Гуам 19:0 (2000 йил)
Энг йирик мағлубият: Туркия - Эрон 6:1 (1950 йил)

Айни дам мазкур терма жамоа FIFA рейтингида 20-ўринни банд этиб турибди. Уларнинг рейтингда энг юқори кўрсаткичи 15 (2005), энг пасти эса 122-ўринни (1996) ташкил қилади.

Жаҳон чемпионатларидаги иштироки

Эрон бунга қадар 5 та мундиалда иштирок этган (бу сафаргиси форслар учун олтинчи бўлади). Улар илк бор 1978 йилда жаҳон чемпионатида кўриниш берган. Шундай бўлса-да, улар ҳали гуруҳ босқичидан чиқиш миссиясини уддалай олмаган. Сўнгги мундиалда ("Россия-2018") форслар Португалия, Испания ҳамда Марокаш термалари билан гуруҳдан жой олган. Ўшанда улар ажойиб тарзда иштирок этганди. Дастлабки баҳсда Испанияга мағлуб бўлган (0:1) Эрон, иккинчи турда Марокашни таслим этган (1:0). Португалия билан ўтган беллашувда эса 1:1 ҳисоби қайд этилганди. Улар "B" гуруҳида 4 очко билан 3-ўринни банд этган ва плей-оффга анча яқин келганди.

Турниргача босиб ўтилган йўл

Эрон "ЖЧ-2022"га қадар узоқ йўлни босиб ўтди. 2-босқичда улар Ироқ, Баҳрайн, Гонгконг ҳамда Камбожа каби термалар билан бир гуруҳдан жой олди. Мазкур босқичда улар 18 очко билан ўз гуруҳида биринчи ўринни қўлга киритди. Улар билан биргаликда 17 очкога эга Ироқ ҳам кейинги босқич йўлланмасига эга чиқди. 3-босқичда эса улар Жанубий Корея, БАА, Ироқ, Сурия ҳамда Ливан билан мундиал йўлланмаси учун курашди. 10 учрашувнинг 8 тасида зафар қучиб, 1 дуранг ва 1 мағлубиятни қабул қилиб олган форслар 25 очко билан "А" гуруҳи пешқадами сифатида тўғридан-тўғри мундиалга йўл олди. 23 очко билан 2-ўринни қўлга киритган Жанубий Корея ҳам Қатар яшил майдонларида ўтадиган мундиалда иштирок этиш имконига эга бўлди.

"ЖЧ-2022"га тайёргарлик жараёнида Кейруш шогирдлари бир қатор ўртоқлик ўйинлари ўтказди. Келинг, сўнгги 3 ўртоқлик учрашуви натижаларига эътибор қаратамиз:

Эрон - Сенегал 1:1
Уругвай - Эрон 0:1
Жазоир - Эрон 2:1

Кўриниб турибдики, Эрон ҳар қандай кучли терма билан ҳам тенгма-тенг кураш олиб боради. Айни вақтда мамлакатда сиёсий муаммолар мавжуд. Терма футболчиларининг ўзи жамоани мундиалдан четлатишни сўрамоқда. Бу ҳақда гапиришни лозим топмадим. Мазкур ҳолат ҳақида SPORTS.uz'да батафсил маълумот берганмиз. Қизиқсангиз, кириб ўқинг!

"ЖЧ-2022"даги тақвими

21 ноябрь

18:00 Англия - Эрон

25 ноябрь

15:00 Уельс - Эрон

30 ноябрь

20:00 Эрон - АҚШ

Эрон - АҚШ баҳси ўзгача аҳамиятга эга. Сабабларни ёзиш шарт эмас, наздимда. Дунёдаги воқеаларга беэътибор бўлмаган инсон буни тушинади.

Худайқулов Карим тайёрлади