Мундиалдаги сўнгги рақиб ҳам чакана эмасди...

Бугун футбол бўйича жаҳон чемпионатининг сўнгги тур учрашувлари якунига етди. Бизнинг гуруҳда миллий терма жамоамиз Африканинг Конго Демократик Республикаси терма жамоаси билан ўзаро куч синашди.

Африканинг ушбу жамоаси сўнгги пайтларда қандай натижалар кўрсатгани билан қисқача танишиб чиқсак. 2025 йилнинг охирида саралаш босқичида дунё футболининг номдор вакиллари Камерун ва Нигерияни таслим этди. Африка кубогида Сенегал билан дуранг ўйнади. Шунингдек, барчамиз кўрдикки, мундиалда Португалия каби Европанинг гранди, ўртоқлик ўйинида Дания ҳам бу жамоага қарши дуранг ўйнаб муроса йўлини танлади.

Агар жамоа таркибига назар ташласак, таркиб ҳар қандай жамоага бош оғриғи бўлиши мумкинлиги кўринади. Жамоа ўйинчилари "Ньюкасл", "Вест Хэм", "Реал Бетис", "Эспаньол", "Уотфорд", "Сандерланд", "Бёрнли", "Монпелье", "Сент-Этьен" каби Европа топ-лигаларидаги жамоаларда фаолият юритишмоқда. Баъзи мутахассислар фикрича бу команда турнирда ҳар қандай тажрибали термага қарши курашувчан футбол таклиф этишга жисмонан кучи етади.

Албатта, юртдошларимиз Конго Демократик Републикаси терма жамоаси устидан ғалаба қозонишимизни исташган эди, бироқ ишонинг, бу ўйинда гарчи мағлуб бўлган бўлсак-да, бизнинг йигитлар майдонда мардонавор кураш олиб боришди десак асло муболаға бўлмайди.

Алоҳида таъкидлаш керак, илк мундиал ҳозирда доимий иштирок этиб келаётган кўплаб дунё термалари учун, таржиба босқичи сифатида келгуси ғалабаларга замин бўлиб хизмат қилган. Бугунги йигитларимиз шунчалик меҳнат қилиб, жаҳон чемпионатида бутун дунёга Ўзбекистон истеъдодли футболчилар юрти эканини намоён этишди.

Асосийси футболимиз ҳозиргидек, шу тарзда ривожланишда давом этсин. Абдуқодир Ҳусанов, Остон Ўрунов, Элдор Шомуродов, Аббосбек Файзуллаев, Беҳруз Каримов, Жаҳонгир Ўрозов, Акмал Мозговой каби футболчиларимиз ортидан яна ёш юлдузлар етишиб чиқаверсин.

Насиб бўлса, келгуси жаҳон чемпионатларида юқори марраларни кўзлаб, Европа грандларини ҳам бизга қарши ҳадиксираб майдонга чиқишига мажбур қиламиз.