Мураббийга қўл кўтарган юлдуз жамоани тарк этди

Фаолияти давомида ПСЖ, “Ливерпуль” ва “Кристал Пэлас” каби клубларда ҳамда Франция терма жамоасида ўйнаган Мамаду Сако бир неча йилдан бери Франция чемпионатида “Монпелье” шарафини ҳимоя қилаётган эди.

33 ёшли футболчи яқинда бош мураббий Мишель Тер-Закарян билан уришиб қолди.

Маълумотларга кўра, иккитомонлама ўйинда бош мураббий футболчининг ҳаракатларига эътироз билдириб, уни уришиб беради. Ўзига бўлган бу муносабатни кўтара олмаган Мамаду Мишель Тер-Закарянни итариб юборади ва у йиқилиб тушади.

Мамаду Сако энди бу жамоада ўйнамайдиган бўлди. Футболчининг ўзи ҳам шартнома бекор қилишга розилик берди.

- Сени ҳурмат қилишмаган столдан туриб кетишни ҳам билиш керак. Ўтган ҳафтада рўй берган можародан кейин “Монпелье” билан ҳамкорликни тўхтатишга қарор қилдим, - деб ёзди Мамаду Сако ўз ижтимоий саҳифасида.

2021 йилдан бери Сако бу жамоада 49 та учрашувда майдонга тушиб, ўз ҳисобига битта гол расмийлаштирган.