Муроджон Аҳмадалиевнинг вазнида чемпионлик жангидан олдин "Face to Face" маросими бўлиб ўтди (Видео)

Биринчи ярим енгил (-55,2 кг) вазн тоифасида WBC йўналишида жаҳон чемпиони ҳисобланган Луис Нери Тошкент вақти билан 16 май тонгида "Show Time" канали орқали трансляция қилинадиган бокс оқшомида ўз камарини WBА Regular чемпион Брендон Фигероадан ҳимоя қилади. Жанг Калифорниянинг "Dignity Health Sports Park" аренасида бўлиб ўтади. Қолаверса, ушбу кечада собиқ жаҳон чемпиони Даниэль Роман ҳам ўзининг навбатдаги жангини ўтказиши кўзда тутилган. Мазкур баҳс олдидан боксчилар вазн меъёрини бажариб, "Face to Face" маросимида иштирок этдилар.

Луис Нери (31-0, 24 КО) ўзининг охирги жангида Аарон Алемедани 12 раунд якунига кўра, очколар ҳисобида мағлуб этиб, вакант бўлган WBC камарини қўлга киритган эди.

Брендон Фигероа (21-0-1, 16 КО) Дэмиен Ваcкес устидан 9-раундда муддатидан олдин ғалаба қозонган. У ушбу ғалабасидан 10 ой олдин 12 раундлик жангда Хулио Сеха билан дуранг қайд этган эди.