МЮ Фернандешга Испаниядан ўринбосар топди

Ла Лиганинг "Атлетик Бильбао" клуби сафида тўп сураётган хавбек Ойян Сансет Англияга йўл олиши мумкин. Бу ҳақда "Football Transfers" нашри хабар тарқатди.

Маълумотларга кўра, 25 ёшли испаниялик ярим ҳимоячига "Манчестер Юнайтед" жиддий қизиқиш билдирмоқда. Айнан у жамоани тарк этиши мумкин бўлган португалиялик юлдуз Бруну Фернандешнинг ўрнини босиши мумкин деб кўрилмоқда. Фернандешга Саудия Арабистони клублари жиддий талабгор бўлиб турибди.

Сансетни "Олд Траффорд"га таклиф қилиш ташаббуси эса жамоа бош мураббийи Рубен Аморим томонидан кўтарилган. У Сансетнинг ўйин услуби ва жамоага бериши мумкин бўлган динамикасига ишонмоқда.

Ойяннинг трансфер бозоридаги нархи тахминан 60 миллион еврога баҳоланмоқда. Унинг "Атлетик" билан амалдаги шартномаси 2032 йил ёзигача мўлжалланган.

Манбада келтирилишича, агар МЮ етакчиси ҳақиқатдан ҳам жамоани тарк этса, Сансет унинг муносиб ўринбосарига айланиши мумкин. Унинг ёши, Ла Лигадаги тажрибаси ва техникаси "Юнайтед"нинг янги режаларига мос тушади. Трансфер амалга ошса, бу ҳам испаниялик футболчи учун, ҳам "қизил иблислар" учун янги имкониятларга йўл очиши мумкин.