МЮ Каземирога ўринбосарни "Реал"дан топди

"Манчестер Юнайтед" 33 ёшли ярим ҳимоячи Каземиро билан шартномани узайтирмоқчи, бироқ буни оддийроқ шартларда амалга оширмоқчи, бразилиялик футболчи бунга рози бўлмаслиги мумкин. Шу боис "қизил иблислар" унинг ўрнига "Реал" аъзоси Орельен Тчуаменини таклиф қилмоқда. Бу ҳақда Defensa Central хабар бермоқда.

Манбага кўра, Мадрид клуби "Тчуамени бўйича таклифларни эшитиш ниятида эмас." "Қаймоқранглилар"нинг таъкидлашича, франциялик футболчи ўтган мавсумга нисбатан сифатлироқ ўйин намойиш этмоқда. Айни дамда Тчуаменининг трансфери 90-100 млн еврога баҳоланмоқда - бу Европанинг йирик клубларини ҳам чўчитиши мумкин бўлган сумма.

Жорий мавсумда 25 ёшли ярим ҳимоячи барча мусобақаларда 15 та ўйинда майдонга тушиб, уларда гол урмади. Футболчининг клуб билан меҳнат шартномаси 2028 йилнинг ёзигача мўлжалланган. Трансфермаркт порталида келтирилган маълумотларга кўра, футболчининг бозор нархи 75 млн еврони ташкил этади.