“Насаф” Европа футболига зўр тўпурар тарбиялаб берган экан!

Хориж мамлакатларида тўп тепаётган футболчиларимиз орасида энг яхши натижани Бобур Абдухолиқов қайд этиб келмоқда. Беларусь чемпионати олий лигасида ўйнаётган қашқадарёлик ҳужумчи деярли ҳар бир учрашувда рақиблар дарвозасини ишғол қилмоқда.

Бугунги кунда ҳамюртимизнинг хориж чемпионатидаги ўйнлари ва голлари сони тенг, яъни 20 тадан.

Статистика билан шуғулланаётган мутахассислар ўзбекистонлик ўйинчининг кўрсаткичларини ҳисоблаб бормоқда ва унга кўра 25 ёшли легионеримиз тўпурарлик борасида бир неча аҳамиятга молик натижаларга эришди.

Хусусан, Бобур “Энергетик-БГУ” тарихида бир мавсумда энг кўп гол урган футболчи ҳисобланади. Бундан ташқари, ўтган мавсумдаги икки голини қўшиб ҳисоблаганда миллий чемпионатда жами 22 та гол урган  ва бу ҳам рекорд натижа сифатида қайд этилган.

Беларусь чемпионатида 2007 йилдан бери ҳеч бир футболчи 20 тада ва ундан ортиқ гол ура олмаётган эди. Охирги маротаба бундай сермаҳсулликни ўн беш йил муқаддам “Гомель” ҳужумчиси Роман Василюк намойиш этган. Ўшанда бу футболчи рақиблар дарвозасини 24 маротаба ишғол қилган.

Бобур Абдухолиқовда чемпионатнинг қолган 10 та учрашувида яна бешта тўп киритиб, Василюкдан ўзиб кетиш имконияти бор.

Статистика мутахассислар агар ўзбек футболчиси голли сериясини давом эттирса, мавсум охиригача бир неча рекордларни йўққа чиқариб, ўз номини Беларусь футбол тарихига ёздириб қўйиши мумкинлигини таъкидламоқда.

Хусусан, Василюкнинг натижасини ортда қолдириш, Бобурга муаммо туғдирмайди. Агар буни уддаласа, Абдухолиқовнинг олдида янги марра – Беларусь  футболи тарихида энг кўп гол урган футболчига айланиш имконияти очилади.

Бу тарихий натижани қайд этиш учун Бобур Абдухолиқов яна уч нафар тўпурарнинг кўрсаткичларини йўққа чиқаришига тўғри келади. Хусусан, россиялик Сергей Давидов 2001 йили “Нёман” жамоасида ўйнаб юрган кезлари бир мавсумда 25 та тўп киритган.

Юқорида номи тилга олинган Роман Василюк 2000 йили “Славия” сафида 31 та гол муаллифи бўлган.

Беларусь чемпионатидаги энг зўр натижани 1996 йили “Белшина” футболчиси Андрей Хлебосолов қайд этган. Бу ҳужумчи рақиблар дарвозасини 34 маротаба ишғол қилгани қайд этилган.

Кўриниб турибдики, “Насаф” УЕФА таркибидаги миллий лигаларда ҳам кўп гол ура оладиган футболчи тарбиялаган. Трансферларга ихтисослашган https://www.transfermarkt.world сайтидаги маълумотларга қараганда, Бобур қаршиликлар сафида Суперлигада 102 та учрашувда 37 та гол ва иккита ассист муаллифи бўлган. Осиё Чемпионлар лигаси саралаш турнири ва финал босқичларида тўртта, Ўзбекистон кубогида  битта гол ургани ёзилган.

Ушбу порталда маълумотига кўра, Абдухолиқов клублар миқёсида жами 167 та баҳсда 73 та гол ҳамда 11 та ассист муаллифи бўлган.

Бобур Абдухолиқов бир неча клублар нишонда турибди. Унга ёзда Россиянинг “Сочи”, Германиянинг “Ганновер”, Туркиянинг “Гёзтепе”, Польшанинг “Гурник”, “Видзев” ва Шотландиянинг ўртамиёна жамоаларидан биридан қизиқиш бўлди.

Туркия ва Польша жамоаларининг мақсади ва шароити Бобурга тўғри келгани йўқ. “Сочи”нинг қизиқиши таклифга айланмади. Шотландлар харажатдан қочди. Ҳозирча, “Ганновер” трансфер масаласини қишда кўриб чиқиш имкони бўлишини маълум қилган.

Абдухолиқов Саудия Арабистони ва Қатардан бўлган чорловларга Европанинг кучли лигаларига ўтмоқчилигини айтиб, рад жавобини берган.

Легионер дегани ўзбеклардай бўлади!

Шомуродовга бир қараб қўй, Моуриньо!

Тўпурар легионеримиз Туркия, Польша, Қатар, Саудия клублари таклифини рад этди ёхуд навбатда Германия жамоаси турибди!