“Насаф" футболчилари Қамашида(фото)

Қамаши туманидаги 4-сонли Меҳрибонлик уйи тарбияланувчилари 2018 йилнинг 8 февраль эрталабдан сабрсизлик билан ташрифи куталаётган меҳмонларни кутишмоқда. Ва ниҳоят меҳмонларнинг автобуси кўринди. Тарбияланувчилар, айниқса, ўғил болаларнинг қувончини кўрсангиз, қалбингизда ўзгача туйғулар пайдо бўлади. Мана шундай шарафга эришишнинг ўзи катта бахт. Бунга фақат ва фақат меҳнат билан эришилади.

Ўзбекистон Олий лигасида ўтган мавсумда кумуш медалларни қўлга киритган Қаршининг “Насаф” жамоаси бугунги кунда нафақат воҳада балки юртимиз бўйлаб кўплаб мухлисларига эга жамоа ҳисобланади. Уларнинг меҳрибонлик уйига ташрифи Қамаши туман футбол ихлосмандларини ва меҳрибонлик уйи тарбияланувчиларини жуда ҳам хурсанд қилди.  Айниқса, улар орасида яқинда ёшлар ўртасида Осиё чемпионлигини қўлга киритган терма жамоа сафида тўп тепган футболчиларнинг борлиги тадбирнинг янада кўтаринки бўлишига хизмат қилди.

Меҳрибонлик уйида ташкил қилинган тадбир давомида “Насаф” жамоасининг мураббий ва футболчиларига  уларнинг ашаддий мухлислари ўзларининг қизиқарли саволларини беришди. Тарбияланувчилар севимли “Насаф” жамоаси билан эсдалик учун сурат ҳам тушишди.

Шундан сўнг, меҳрибонлик уйида машғулотларни олиб бораётган  Қамаши туман Болалар ва ўсмирлар спорт мактабининг футбол тўгараги  ёш футболчилардан иборат жамоа “Насаф” жамоасига қарши  ўзаро ўйинда майдонга чиқди. Ўртоқлик тарзида уюштирилган учрашув ёрқин лаҳзаларга бой бўлди. Ўйин давомида тарбияланувчилар севимли жамоаси посбони қўриқлаган дарвозага икки бор тўп киритишга муваффақ бўлишди. Ушбу қизиқарли “мастер класс” учрашуви ёш футболчиларга олам-олам қувонч олиб келди.

“Насаф” жамоаси аъзолари меҳрибонлик уйи тарбияланувчиларига мустаҳкам соғлик, ҳаёт йўлларида мувафаққиятларга эришишларини тилаган ҳолда,  имзолари туширилган махсус тўплар ва футболкаларни эсдалик учун топширишди. Тадбир сўнггида  меҳрибонлик уйи тарбияланувчилари ўзиларининг ажойиб  куй ва қўшиқлари билан меҳмонларга байрам кайфиятни улашди.    

"Шуни таъкидлаш жоизки,   “Насаф ” жамоасининг меҳрибонлик уйига ташрифи  бу ерда тарбияланаётган болажонларга  қувонч, самимийлик ва кўтаринки кайфият олиб келгани учун бош ҳомий “Шўртан газ кимё мажмуаси” МЧЖ  директори  ва “Насаф ” ПФК клуб президенти  Искандар Умаровга ўз миннатдорчилигимни билдирмоқчиман", - дейди 4-сонли меҳрибонлик уйи директори Гулбаҳор Ҳамидова.

"Умид қиламанки, меҳрибонлик уйларида бундай юқори савиядаги байрамона  тадбирларни ташкил этаётган  ташкилотчилар болажонларнинг қалбида келажакка бўлган  ишончни уйғотишмоқда", - деди меҳрибонлик уйи маънавий-маърифат ишлари бўйича  директори ўринбосари  Рўзибой Абдиев. Ишонч хисси – бу ҳар бир инсонни яшашга ва келажакка талпинишга ундайди.

Фахриддин Чориев