"Насаф" футболчиси ажойиб натижа қайд этди. У бу мавсум чемпионликка, кумуш ва бронза медалларига эга чиқди

"Насаф" жамоаси таркибида жорий мавсумда дебют қилган Ҳусайн Норчаев ажойиб натижа қайд этди.

Клуб матбуот хизматининг маълум қилишича, футболчи ушбу мавсумда Суперлига, U-18 ҳамда U-21 биринчилигида ҳам иштирок этди. Норчаев U-18 жамоаси таркибида Ўзбекистон чемпионлигини, U-21 биринчилигида бронза медалини, бош жамоа таркибида Суперлиганинг кумуш медалини қўлга киритди.

Ҳусайн Норчаев Суперлигада учта гол урган бўлса, U-21 биринчилигида ҳам дарвозаларни айнан шунча ишғол қилди. U-18 биринчилигида рақиб дарвозасига бир маротаба йўл топа олган.