“Насаф” либосида “Сурхон” учун тўп тепган яширин “агент” ким эди?

Эндиликда SPORTS.uz Суперлига тур якунларига кўра энг “яхшилар”ни аниқлаб боради. Хўш, бешинчи турда кимлар ўзини ёмон томондан қолганлардан кўра "яхшироқ" кўрсатди? Бизда бешта вариант бор. Матн катталашиб кетмаслиги учун қисқа ва лўнда тушунтирамиз!

5 ўрин. Бақоевни хафа қилган йигит

Улуғбек Бақоев “Бухоро”ни қабул қилиб олгач, дебютдан клуб мухлисларининг умиди катта эди. Рақиб, ҳали енгилмаган “Бунёдкор” бўлишига қарамай! Дарҳақиқат, “Бақоев” ўз шогирдларини анчагина кескин ўйнашга мажбур эта олди, бироқ бутун бошли баҳсни “Бухоро” посбони қилган битта хато барбод қилди десам, ишонасизми? Келинг, тушунтираман.

Таблодаги 0:2 ўз йўлига. Баҳснинг 15 дақиқаси. Қанотдан узатиб берилган тўпни дарвозабон илиб олиши, ёки жарима майдончасида узоқлаштириши мумкин эди. Никола Стошич катта тезликда келаётган Исмоналиевни кўрмай қолди. Натижада, кипернинг қўпол хатосидан кейин, ҳисоб очилди. Қолган 75 дақиқа давомида, “Бухоро” ҳимояда тартибли ўйнаб, имкон бўлганида рақибга босим ўтказди. Афсуски, гол кирита олгани йўқ. Ҳакам томонидан қўшиб берилган дақиқаларда эса, рақиб жарима майдончасига омадини излаб келган дарвозабонни “Бунёдкор” иккинчи бор жазолади. Яъни, Бақоевнинг агрессив қарши ҳужумга таянган ўйин фалсафасини дарвозабон 15 дақиқадаёқ бир пулга айлантирди. Агар, бу хато бўлмаганида, ўша оқшом “Бухоро” “Бунёдкор”да очко олиш учун яхши имкониятга эга бўлиши аниқ эди.

4 ўрин. “Насаф” либосида “Сурхон” учун тўп тепган яширин “агент”

Жамоаси ғалаба қозонганига қарамай, “Насаф” футболчиси бу ТОП 5 да нима қиляпти деб ҳайрон бўлманг. Оша куни “Сурхон”га қарши ўйинда Абдувоҳид деярли “учар тулпорлар” шарафини ҳимоя қилган “агент”дек ўзини тутди. Вазиятни таҳлил қиламиз:

1 гол. Абдувоҳид ўз ўрнини тарк этишга уринди, аммо ҳимоячи вазиятни бартараф этди. Айни шу онда посбон дарвоза олдидаги ўз ўрнини йўқотиб қўйди. Натижада, Нимели йўллаган зарбани бартараф эта олгани йўқ. Ваҳоланки, зарба деярли Неъматов турган зонага йўлланган эди.

2 гол. Тезлиги у қадар баланд бўлмаган Умар Эшмурдов рақиб босим қилаётганини сезиб, тўпни боши билан дарвозабонига ташлаб бермоқчи эканлигига ишора қилди. Тезроқ масофани қисқартириш ўрнига, Абдувоҳид реакция билдиришга кеч қолди. Яъни, ўрнини кеч ташлаб чиқди. Натижада, “Сурхон” форварди тўпга посбондан аввалроқ етиб келиб уни хато қилишга мажбур қилди. “Насаф” бахтига рефери буни сўнгги нажот фоли ўрнида қабул қилгани йўқ. Акс холда, қизил карточка кўрсатиб Абдувоҳидни ўйиндан четлатиши, “Насаф”ни мураккаб аҳволда қолдириши ҳеч гап эмас эди. “Аждарлар” бир аммалаб ўйинга қайта олди, аммо Абдувоҳиднинг қўпол хатолари баҳс боришига таъсир кўрсатмай қолмади.

Катта эҳтимол, кейинги ўйинда қаршиликлар дарвозасини Умиджон Эргашев қўриқласа, ҳайрон бўлиб юрманг! Олимпия терма  жамоамизнинг асосий посбони ўсиб, бошқа даражага кўтариладиган ёшда. Энди, уни бу  хатоларини ёшлигига йўйиш имконсиз.

3 ўрин. Нурилло Тўхтасинов – Иккита дербини кўтара олмаган талант

Баъзан, футболда ортиқча эмоция ҳам панд бериб қўйиши мумкин. Нурилло Тўхтасинов “Андижон”га қарши ўйинда шу сўзлар нақадар тўғри эканлигини амалда исботлаб берди. Водий дербиси энг қизғин паллага кирган пайт, сариқ карточкаси бор эканлигини била туриб, умуман кераксиз контактга боргани учун майдондан четлатилган ярим ҳимоячи Фарғоналик ишқибозларни анчагина асабийлашишга сабаб бўлди.

Агар, “Андижон” ҳисобни қисқартира олганида, (ўйин давомида бунга етарлича имконият бўлди) чўнтакдаги нақд ғалабани бир очкога алмаштиришга “Нефтчи” мажбур бўлар эди. Қаҳрамонимизнинг бахтига, “йўлбарслар” мудофаада мардонавор ўйнаб беришди. Нурилло эса, жамоасини қийин аҳволда қолдирибгина қолмай, келаси турда “Турон”га қарши бўладиган кейинги водий дербисини ўтказиб юборади. Бу подкат шунга арзирмиди?

2 ўрин. Иван Йосович - “Қоратоғликлар” отишмасидаги айбдор

“Қоратоғлик” мутахассислар дуэлида чинакам “отишма” содир бўлди. 2:2. Ўйин у томондан, бу томонга кўчиб ўтди. Забиҳулла Ўринбоевнинг супер голидан сўнг, “Металлург” жангни ғалаба билан якунлашга жуда яқин келган эди, аммо меҳмонлар ҳимоячиси Йосович позиция танлашда жуда қўпол харакат қилиб тўпни йўқотиб қўйди. Сердар Сердаров эса, кечириб ўтиргани йўқ.

Натижада, “Металлург” хорижлик легионер туширган “қовун” сабабли 3 очкодан маҳрум бўлди. Тўғриси, бу легионернинг қўпол хатосини томоша қилар эканман, заҳирада ўтирган ўзимизнинг қора кўзларни уволи ўзбек футболини тутади деб ўйлаб қўрқиб кетдим…

1 ўрин. Самвел Бабаян - Мухлислар ишончини йўқота бошлаган мутахассис

Ишонч – бу футболдаги энг муҳим омиллардан бири. Наманганлик ишқибозлар айнан шу ишонч сабабли ҳар мавсум ўз суюклиларини қўллаб-қувватлашдан чарчамай келмоқда. ОКМК билан баҳс олдидан ҳам шу ишонч “лочинлар” фанатлари базасида уфуриб турган эди. Якун эса…

Ўйин якунланишига 5 дақиқа қолганида, ЖАР стадионига йиғилган “Навбаҳор” ишқибозларини майдонга қарата “Бабаян позор” деб ҳайқираётгани эшитилиб қолди. Ваҳоланки, чемпионатнинг эндигина 5 тури давом этмоқда. Энг ачинарлиси, ўйин якунланишига 2-3 дақиқа қолганида айрим ишқибозлар трибуналарни ҳам тарк этаётгани кўринди. Бу клуб мухлислари ва Самвел Бабаян ўртасидаги энг муҳим кўприк – Ишончни йўқолаётганидан далолат.

Билмадим-ку, агар бу кўприк бузилса, Наманганда Бабаян уёқда турсин, Карло Анчелотти ҳам узоқ ушланиб қолмаслиги мумкин. Буни тарих кўп бор исботлаган. Хўш, бунда Самвел Бабаяннинг айби борми? Бу анча баҳсли вазият, аммо шуниси аниқ-ки, мутахассис жуда яхши таркиб йиғишни уддалади. Бундай бюджет ва имкониятларга эга бўлгач, унга майдонда жавоб бериш мураббийнинг бирламчи вазифаси. Натижа ўхшамаяптими, тамом мураббийдан сўраб олинади. 100 олдин ҳам шундай эди. 100 йилдан кейин ҳам футболда шундай бўлиб қолаверади.

Норбой Муаллим