"Насаф"нинг чемпионлик имконияти қандай?

Ўзбекистон Суперлигасида 19-тур учрашувлари якунига етди. Чемпионат тугашига эса 7 тур қолди. Олдинги йилларга қараганда, бу мавсум Ўзбекистон биринчилигида ўйинлар анча қизғин кечмоқда. Ўтган мавсумларда 19-турдан кейин чемпион номи деярли аниқ бўлиб қолар эди. Бироқ ҳозир қайсидир жамоани аниқ чемпионликни қўлга кирита олади дея айта олмаймиз.

Халқаро ўйинлар сабаб Ўзбекистон Суперлигасида ҳам қисқа танаффус юзага келади. Шу боис, биз вазиятдан фойдаланиш мақсадида чемпионлик учун асосий даъвогар бўлиб турган 3 та клуб – “Насаф”, “Пахтакор” ва “Навбаҳор”нинг имкониятларини баҳолаймиз. Сабаби, ҳозирда мазкур жамоалар чемпионатда тўртинчи ва бешинчи ўринлардаги клублардан очколар борасида бироз илгарилаб кетган (5 очко).

Турнир жадвалидан келиб чиқсак, ҳозирда “Насаф” олтин медаллар учун асосий даъвогар бўлиб турибди. Шунинг учун, бугун “ажарлар”нинг Суперлигада ғолиб бўлиш имкониятини кўриб чиқамиз.

“Насаф”

Қарши клуби 19-турдан кейин  38 очко жамғарган ҳолда турнир жадвалида етакчилик қилмоқда. “Насаф” ўтган учрашувларда 10 та ғалаба ва 8 та дуранг қайд этган, шунингдек, бир марта майдонни очколарсиз тарк этган. Тўплар фарқи – 31:10.

“Аждарлар”ни олдинда 7 та муҳим баҳс кутиб турибди:

“Пахтакор” – “Насаф”
“Насаф” – “Сўғдиёна”
“Қизилқум” – “Насаф”
“Насаф” – “Бунёдкор”
“Насаф” – “Динамо”
“Насаф” – “Нефтчи”
“Олимпик” – “Насаф”

Айтиш мумкинки, Рўзиқул Бердиев шогирдлари учун ҳақиқий синов энди бошланади. Чунки қаршиликлар кейинги 3 та турни Суперлигада етакчи ўринларда кетаётган жамоаларга қарши ўтказади. Улар 1 октябрь куни “Пахтакор” майдонига сафар уюштирса, 8 октябрда “Сўғдиёна”ни Қаршида қабул қилади. Кейин эса “аждарлар” Навоийда “Қизилқум”га қарши саф тортади. Агар клуб мазкур уч беллашувда максимал очколарни қўлга кирита олса, Бердиев шогирдлари чемпионлик учун катта қадам ташлаган бўлади. Сабаби “Пахтакор” ҳозир “Насаф” билан бир хил 38 очко тўплаган бўлса, “Сўғдиёна” ва “Қизилқум” 32 очко билан тўртинчи ва бешинчи ўринларни банд этган.

Айтиш жоизки, “Насаф”нинг Тошкентда Максим Шацкихнинг “шерлар”ига қарши ўйини кўп нарсани аниқлаштириб беради. Бу учрашувдаги мағлубият “аждарлар”га нафақат етакчи жамоадан 3 очко ортда қолишга, балки медаллар учун курашдан ҳам узоқлашишига сабабчи бўлади. Чунки кейинги ўринларда келаётган “Навбаҳор”, “Қизилқум” ва “Сўғдиёна” билан орадаги фарқ катта эмас. “Насаф” ва “Пахтакор”нинг биринчи даврадаги ўйинида ҳисоб очилмаган – 0:0. Биринчи давра якунланганидан кейин ушбу жамоалар Тошкентда ўртоқлик учрашуви ўтказди ва унда Пойтахт клубининг қўли баланд келган эди – 3:1. Аммо ҳозир вазият умуман бошқача.

“Пахтакор” ҳар доим “Насаф” учун ноқулай рақиб бўлиб келган. Агар бу жамоалар ўртасидаги сўнгги беш баҳсга қарайдиган бўлсак, Тошкент клуби 3 марта, “аждарлар” эса 1 марта ғалаба қозонган. 1 баҳсда эса ғолиб номи аниқланмаган.

Айни пайтда “Насаф” учта “фронт”да кураш олиб бормоқда – Суперлига, Ўзбекистон кубоги ва ОЧЛ. Осиё чемпионлар лигаси кейинги йилнинг февраль ойида давом эттирилишини ҳисобга олсак, Қарши клуби ҳозирча чемпионат ва кубок ҳақида бош қотириб турса бўлади. Аммо “Насаф”дан фарқли ўлароқ “Пахтакор” на Осиё чемпионлар лигасида, на Ўзбекистон кубогида қатнашмоқда. Улар ҳар икки мусобақадаги юришини ҳам бироз эрта якунлаган. Шунинг учун Шацких ва унинг “шерлар”и бор эътиборни ички чемпионатга қаратади. Бу эса “аждарлар” учун бироз қийинчилик туғдириши табиий.

Агар “Насаф” Тошкентдан 3 очко билан қайтадиган бўлса, “Сўғдиёна” ва “Қизилқум”га қарши ўйинларда руҳий томонлама устун ҳолда иштирок этади. Қолаверса, “аждарлар”нинг Жиззах ва Навоий клубларига қарши сўнгги ўйинлардаги натижаларини ҳам ижобий дейиш мумкин. Хусусан, биринчи даврада кечган “Сўғдиёна” – Насаф” баҳсида Бердиев жамоаси 2:1 ҳисобида ғалаба қозонган, “Қизилқум” қарши Қаршида кечган ўйинда эса “аждарлар” фойдасига 5:0 ҳисоби қайд этилган.

Клуб кейинги учта турни ўз майдонида ўтказади – муаммолар гирдобидаги “Бунёдкор”, деярли Суперлига билан хайрлашган “Динамо” ва бир текисда ўйин кўрсата олмаётган “Нефтчи”. Ҳозирга ҳолатдан келиб чиқадиган бўлсак, ушбу баҳсларда фаворит жамоа номи маълум.

“Насаф” сўнгги турни Тошкентда ўтказади. Қаршиликлар ўша куни кўплаб грандлар учун “чақилмаган ёнғоқ”га айланиб улгурган “Олимпик”ка қарши саф тортади. Бу жамоаларнинг биринчи даврадаги ўйинида 2:2 ҳисоби қайд этилган. Таъкидлаш керакки, мазкур баҳсда қайсидир жамоани устун дея олмаймиз. Аммо “Насаф” ушбу баҳсларга йўқотишларсиз етиб кела олса, яъниким Кападзе жамоасига қарши ўйингача улар ҳамон биринчи ўринда бўлса, Қарши клубини ҳеч нарса тўхтата олмайди. У ҳолда, Бердиев жамоаси фақат ғалаба учун ҳаракат қилади. Бироқ бунинг акси бўлса...

Ҳозирги ҳолатдан келиб чиқадиган бўлсак, “Насаф”нинг чемпион бўлиш имконияти ўз қўлида. Агар улар барча рақибларга қарши максимал очколарни тўплай олса, ҳеч нарса тўсқинлик қила олмайди. Фақатгина “Пахтакор” тўплар фарқига кўра “Насаф”дан ўтиб кетиши мумкин. Бироқ ҳозир “аждарлар” киритилган ва ўтказиб юборилган тўплар фарқи бўйича +21 натижани қайд этиб турибди, “шерлар”да эса бу кўрсаткич +15ни қайд этмоқда.

Агарда, биз 100 фоизлик категорияда оладиган бўлсак, “Насаф”нинг чемпион бўлиш имкониятини 80 фоизга баҳолаган бўлар эдик.

Сабаби ҳозирда улар мусобақада 1-ўринни банд этган, шунингдек барча нарса клубнинг ўз қўлида. Яъни улар қолган клубларга ўхшаб, бошқа жамоанинг очко йўқотишини кутишмайди.

Албатта, бу бизнинг субъектив фикрларимиз ҳисобланади. Барча натижалар эса майдондаги футболчилар ва мураббийларнинг қарорлари эвазига қайд этилади.

P.S. Эртага “Пахтакор” ва “Навбаҳор”нинг чемпионлик имкониятлари ҳақида гаплашамиз.

Жамшидбек Маҳмудов