"Насаф"нинг янги трансферлари Иван Соловьёв ва Шароф Муҳитдинов "Пахтакор" ва "Навбаҳор"га қарши ўйинларда майдонга тушиши мумкин
2021 йилнинг 7 октябрь куни ФИФА Низоларни ҳал этиш палатаси “Насаф” футбол клуби ва франциялик футболчи Абделае Диаките ўртасидаги низоли вазият юзасидан қарор чиқарган эди. Унда кўрсатилишича, “Насаф” футболчи билан тузилган шартнома шартларини бажармаган.
Якунда футболчи ФИФАга мурожаат қилган ва ФИФА “Насаф” футбол клуби зиммасига белгиланган қарздорлик ва жарима тўловларини 45 кун мобайнида тўлаб бермагани сабаб “Насаф”га трансфер тақиқи белгилаган эди.
“Насаф” куни кеча ушбу футболчи билан қарздорликни тўлаш бўйича тинчлик битими имзолади ва ФИФАга тақиқни олиб ташлаш бўйича мурожаат юборилди.
Бугундан эътиборан ФИФА ушбу иш доирасида “Насаф”дан трансфер тақиқини олиб ташлади.
Энди "аждарлар" янги амалга оширган футболчиларини рўйхатдан ўтказиши мумкин. Қолаверса, Иван Соловьёв, Шароф Муҳитдинов ва эҳтимолий янги футболчилар Суперкубок ҳамда Суперлиганинг илк туридан бошлаб майдонга тушиши мумкин. Қаршиликлар Суперкубокда 27 февраль куни мамлакат чемпиони "Пахтакор" билан беллашса, Суперлига-2022нинг биринчи турида "Навбаҳор"га қарши учрашув кутмоқда.
Шунингдек, яқиндагина "Насаф" клуби директори, бош мураббий, футболчилар, мухлислар ва ОАВ билан учрашувда Рўзиқул Бердиев жамоага яна бир ҳужумчи кераклиги ҳақида гапирганди. Бу кутилаётган трансфердир ва у легионер бўлиш эҳтимоли бор.
Фикрлар