"Навбаҳор" "Ал Иттиҳод"ни енгиши мумкинмиди? (Таҳлил)

"Ал Иттиҳод"га қарши ўз уйида тўп сурган "Навбаҳор" ҳам "Насаф" сингари нурсиз дурангга имзо чекканига қарамай, Наманганлик ишқибозлар бу баҳс натижасини ижобий қабул қилди. Хўш, "лочинлар" учун жавоб ўйинида "нон" борми? Намангандаги баҳсда Самвел Бабаяннинг имзоси кўриндими? Осиёнинг энг бадавлат жамоаларидан бири билан ўйиндаги қониқарли натижа сабаби нима? Бугун, ОЧЛ плей-оффидаги "Навбаҳор"нинг илк ўйинини таҳлил қиламиз.

Трансфер ойнаси чоғида марказий ҳимоя чизиғидаги муаммолар тўлиқ бартараф этилмаган эди. Қўшимчасига, "Ал Иттиҳод" билан ўйинни Иброҳим Йўлдошев ҳам ўтказиб юборди. Натижада, мудофаа чизиғида "лочинлар" ихтиёрида вариантлар камайиб кетди. Тўғри, жамоа билан йиғинларда ишлаган бир нечта ёш йигитлар ҳам бор эди, аммо бундай катта босимга уларни ташлашни Самвел Бабаян истамади. Натижада, Сайфиев-Жокич-Иванович-Болтабоев квартети юзага келди. Бир қарашда, ностандарт қарор, бироқ мураббий мажбурий ротацияни уддалай олди.

"Ал Иттиҳод" эса, 4-3-3 схемасига мурожаат этди. Баҳс аввалида, Наманган клуби ўз жарима майдончаси ичида зичроқ жойлашган холда, рақибга бўш зона бермасликка, биринчи имкон бўлиши билан олдинда турган Тома Табататзени қарши ҳужумга бошлашни режа қилган эди. Жиддадан келганлар илк дақиқалардан агрессияни оширган холда, доминант футбол ўйнашга ҳаракат қилди. Рақиб бош мураббийи - "Навбаҳор"нинг "Ал Ҳилол"га қарши ўйинини томоша қилгани, ўргангани аниқ. Айнан шу омил сабабли "Ал Иттиҳод" катта куч билан олдинга ташлангани йўқ. Соддароқ қилиб айтсак, қарши ҳужум хавфини ҳис қилиб ҳаракат қилди. Шу омил сабабли жамоанинг 4-5 футболчиси билан уюштирган ҳужумларини "Навбаҳор"нинг икки қатордан иборат ҳимоя блоки ортиқча муаммосиз зарарсизлантиришни уддалади. Тўп назорати 34/66 фоиз "Ал Иттиҳод" фойдасига бўлишига қарамай, 100 дақиқа давомида xGда бор йўғи 0.90 кўрсатгич қайд этди холос.

Яратилган вазиятлар кескинлиги ва сони борасида меҳмонлар яхшироқ кўринганига қарамай, ижрочилар класси ва жисмоний тайёргарлик борасидаги устунлик ҳам "Ал Иттиҳод"ни "Навбаҳор" устидан ғалаба қозонишни таъминлай олгани йўқ. Наманганликлар тўлиқ ўйин давомида кескинликни сақлаб қолиш эвазига "Ал Иттиҳод"ни 100 фоиз куч билан олдинга ўтишдан тийиб турди. "Навбаҳор"нинг имкониятини тўғри баҳолаган холда, консерватив танлаган ўйин стратегияси иш бериши мумкин эди, бироқ марказий ҳужум чизиғидаги Тома Табататзе кутилганидек фаол бўла олмади.

Форвард ҳаводаги 6 та курашни 3 тасини енгган бўлса, пастдаги курашда ҳам 50 фоизини ютиб берди холос. Ўйин давомида нақд 10 бор тўпни ҳужумда олдириб қўйди. Ўйин давомида амалга оширган паслари аниқлиги 60 фоизни ташкил этди.

Мен Томани танқид қилмоқчи эмасман, аммо жамоанинг ўйинга танлаган стратегияси 100 фоиз иш бериши ҳужум марказидаги грузиялик йигитга боғлиқ эди. Унинг етарлича фаол бўлмагани сабабли, орқа чизиқдаги тартибли ўйин дурангдан бошқа натижа тақдим этмади. У жамоавий прессингда яхши ишлагани сабабли қисман айбини ювгандек кўриниши мумкин, аммо "лочинлар"нинг баҳс давомида зарбага қадар етиб борган барча ҳужумлари чоғида тўпни қабул қилиш зонасида пайдо бўлмади. 

Жамоага сафига янги қўшилган Фарруҳ Сайфиев ва Одил Ҳамробековларни тезда киришиб кетгани ҳам дарров кўзга ташланди.Одил бир неча маротаба рақибнинг эрта прессингидан тўпни талофатларсиз олиб чиқиб кетишни уддалаган бўлса, Фаруҳ ўз қанотида рақибга 90 дақиқа босим ўтказишни уддалади. Шунингдек, Жокичнинг ортга қайтиши ва Болтабоевнинг қанот ҳимоясида кўриниш бериши борасида қабул қилинган қарор ҳам ўзини оқлади. Умуман олганда, “Навбаҳор” гол уришдан бошқа барча ишни ажойиб тарзда уддалади.Шу ўринда, стадионга ташриф буюрган ишқибозларнинг қўллаб-қувватлаши ҳам футболчиларга импулс берганини алоҳида таъкидлаш лозим. "Навбаҳор" тўп учун курашлар чоғида ишқибозлар реакцияси рақибга яхшигина босим юклади. Бу ҳам ўйин боришига ўз таъсирини кўрсатмай қолмади.

Эътиборли томони шундаки, рақиб баҳс давомида "лочинлар" томонидан қўйилган зич ҳимояни ёриб ўта олгани йўқ. Дуранг натижада жавоб ўйинида ҳам жанг таклиф этиш учун яхши стимул вазифасини бажариб беради. Тартибли ҳимоя ва очиқ футбол ўйнашга одатланган "Ал Иттиҳод" учун 14 ҳудудда муаммолар туғдириши мумкин эканлигини Намангандаги баҳс кўрсатиб берди. Умид қиламиз-ки, Самвел Бабаян биринчи ўйинда бўлгани каби, Жиддага ҳам алоҳида режа билан йўл олади. Рақиб таклиф этган босимга дош бера олсак,плей-оффда жон сақлаб қолиш имкониятимиз мавжуд.

Яҳёхўжа Улуғхўжаев