"Навбаҳор" мухлислари хавотирланишмасин, жамоада ҳаммаси жойида"

Coca Cola Суперлига 16-туридан ўрин олган “Навбаҳор” – “Андижон” (0:0) ўйинидан сўнг, мезбонлар ярим ҳимоячиси Исломбек Исоқжонов клуб матбуот хизматига интервью берди.

- Ислом, мазкур баҳсда “Навбаҳор”га ғалаба қозониш учун нима етишмади?

- “Водий дербиси” ўйинлари жамоалар турнир жадвалида қайси ўринда бўлишидан қатъи назар, доимо шиддатли, кескин курашлар остида ўтади. Якунланган баҳс ҳам бундан мустасно бўлмади, албатта.

“Андижон” айни пайтда турнир жадвалининг сўнгги поғонасида бораётган ҳамда аутсайдер бўлса-да, учрашув “водий дербиси” мақомига эга бўлганлиги боис, меҳмонлар бизга муносиб қаршилик кўрсатишга интилди. Ташаббус асосан жамоамиз тарафида бўлди. Бироқ юзага келган вазиятлардан фойдалана олмадик. Шунингдек, омадимиз ҳам келмади. Натижада дуранг қайд этдик.

- “Навбаҳор” сўнгги 7 ўйиндан буён ғалаба қозона олмаяпти. Сизнингча, бунинг сабаби нимада?

- Бунинг сабаби, айтиб ўтганимдек, омадимизнинг келмаганлигида. Имкониятлардан фойдалана олмаслик, сўнгги дақиқаларда ўз дарвозамиздан тўп ўтказиб юборишимиз ҳам панд бермоқда. Ўша 7 учрашувда ҳам майдонда барча имкониятимизни ишга солдик, бор кучимиз билан ҳаракат қилдик. Лекин айтганимдек, жамоамиздан омад юз ўгирди.

Бундан ташқари, сўнгги ўйинларда жамоадошларимнинг айримлари COVID – 19 касаллигига чалиниб, ушбу хасталикдан даволанишларига тўғри келди. Табиийки, бу ҳам ўйинларимизга ўз таъсирини ўтказди.

- Айримлар “Навбаҳор”нинг сўнгги ўйинлардаги омадсизлигини жамоадаги ички муҳит билан боғламоқда ва футболчиларнинг ўзаро муносабатлари ижобий эмаслигини таъкидламоқда. Бу ҳақда нима дея оласиз, яъни жамоада ички муҳит қандай?

- “Навбаҳор”да ички муҳит аъло даражада. Тўғри, жамоа ғалаба қозона олмаса, турли баҳоналар кўпаяди. Аммо мухлислар хавотирланишмасин, бизда ҳаммаси жойида. Насиб қилса, ушбу қийин вазиятдан чиқиб кетамиз. Биз бир оиламиз. Барча футболчилар ва мураббийларнинг бир - бирларига муносабатлари аъло даражада. Худди ака – укадекмиз.

- Жорий мавсумда “Навбаҳор”нинг олдига Осиё Чемпионлар лигаси йўлланмасини қўлга киритиш вазифаси қўйилганди. Энди ушбу мақсадни жамоа Ўзбекистон кубоги соҳибига айланиш орқали амалга ошириши мумкин, шундайми?

- Суперлигада ҳали яна 10 та ўйинимиз бор. Ўша баҳсларда майдонда барча маҳоратимизни ишга солган ҳолда, ғалаба қозонсак, совриндорлар сафидан ўрин олишимиз мумкин. Менимча, ҳали миллий чемпионатимиз ўйинларида совринли ўринлар учун курашиш имкониятимиз бор. Фақатгина қолган баҳсларда ижобий натижаларни қайд этишимиз лозим.

Ўзбекистон кубогини қўлга киритган ҳолда ҳам ОЧЛда қатнашиш ҳуқуқига эга бўлиш мумкин. Кубокнинг ҳал қилувчи финал учрашуви жамоамиз уй ўйинларини ўтказадиган ва биз учун қадрдон бўлган Намангандаги “Марказий” стадионда ўтказилиши ҳам бизга мотивация беради.

Шунинг учун биллур соврин учун бўладиган баҳсларда муваффақият қозониш учун барча имкониятимизни ишга соламиз.

- Мухлисларга тилакларингиз...

- Фурсатдан фойдаланиб, ўзим ва жамоамиз номидан барча ишқибозлардан қайд этилаётган салбий натижалар учун узр сўрайман. Чунки мухлислар жорий мавсумда биз – футболчилардан бундан кўпроғини кутишганди. Шундай бўлса-да, ҳали ҳеч нарса йўқотилмади ҳамда қолган ўйинларда зафар қучиб, мухлисларни хурсанд этиш, улар узоқ вақт давомида орзиқиб кутган ОЧЛ йўлланмасини қўлга киритишга ҳаракат қиламиз. Бахтимизга мухлислар доимо соғ-саломат бўлишсин.

Маълумот учун
Исломбек Исоқжонов - 1993 йил, 29 апрелда Наманган вилоятининг Тўрақўрғон туманида туғилган.
Футбол билан 6 ёшидан шуғулланишни бошлаган.
Биринчи мураббийлари: Шуҳрат ва Холмат Каримовлар.
Тўрақўрғондаги футболга ихтисослашган мактаб-интернатни тамомлаган.
Амплуаси: Ярим ҳимоячи.
Футболчилик фаолияти давомида “Хотира-79” (Уйчи), АГМК (Олмалиқ), “Сўғдиёна” (Жиззах), “Андижон” (Андижон), “Навбаҳор” (Наманган) ва “Металлург” (Бекобод) жамоаларида тўп сурган.
2020 йилдан яна “Навбаҳор”да.
Мухлислик қиладиган жамоаси: “Реал” (Мадрид, Испания).
Ҳавас қиладиган футболчилари: Эден Азар (Бельгия терма жамоаси ва “Реал” клуби ярим ҳимоячиси), Неймар (Бразилия терма жамоаси ва ПСЖ клуби ҳужумчиси) ҳамда Одил Аҳмедов (Ўзбекистон терма жамоаси ва Хитойнинг “Тяньцзинь Тэда” клуби ярим ҳимоячиси).
Оилали, бир фарзанднинг отаси.