"Навбаҳор" устози қийин ўтган ўйин ҳақида нималар деди?

Суперлига 9-туридан ўрин олган "Бунёдкор" - "Навбаҳор" учрашувида 0:0 ҳисобида дуранг қайд этилди. Ўйиндан кейин ташкил этилган матбуот анжуманида меҳмонлар устози Виктор Жалилов қуйидаги фикрларни билдириб ўтди:

"Жуда оғир ўйин бўлди. Ҳар икки жамоа сафида ҳаракат қилган футболчилар бир неча вазиятлар яратди. Лекин улардан фойдалана олишда оқсаш кузатилди.

Бугун ҳимоя ва ҳужум ўртасида бироз баланс етишмади. Одатда, бу футболчиларнинг жисмоний ҳолатига ҳам боғлиқ. Захирадан майдонга тушган Абдураҳимовнинг майдондан олиниши тактика билан боғлиқ. Биз ғалаба қозониш учун барчасини қилдик.

Менимча, жамоа сафидаги легионерлар ёмон ҳаракат қилмаяпти. Биргина Паншанбенинг ўзини оладиган бўлсак, у ҳужумлар ташкил этишда, уларнинг якунлашда яхши ҳаракат қиляпти. Эхсони асосий таркибда майдонга тушмоқдами, демак, у бунга муносиб".