"Навбаҳор"нинг прессинги шу қадар кучлими ёки "Локомотив" ҳимоячилари шунчалик заифми?

Кеча Жалолиддин Қобилжонов ўзининг телеграм саҳифасида “Навбаҳор”нинг 6 ой ичида “Локомотив” дарвозасига киритган иккита ўхшаш гўлини жойлаб, буни сабаби нима деб сўради. Яхши савол. Албатта, унинг жавобини изладик. Иложи борича кичикроқ матнда жавобни баён қилишга уриниб кўраман.

Намангандаги ўйин

“Локо” футболчиси тўпни тепиб юборишдан кўра, назорат қилишни афзал кўрди ва дарвозаси сари олиб борди. Айнан шу зонада “лочинлар” босимни кучайтиради. Ушбу суратда “темирйўлчилар” ҳимоячисида пас беришга бошқа вариант қолмаганини кўриш мумкин. Прессинг аъло даражада ишлади, аммо бу ҳимоячининг айбини ювмайди. У шунчаки тўпни аутга тепиб юбориш орқали вазиятни юмшатиши мумкин эди.

Тошкентдаги баҳс

Дарвозабон биринчи пас орқали ҳужум бошлаши билан “Навбаҳор”нинг 4 футболчиси эрта прессингни кучайтирди. Жамшид Искандеров “Локо” посбонининг йўлини тўсиб, ҳимоячини ортга ўйнаш имконидан айирган бўлса, Марушич иккинчи марказий ҳимоячи йўлини беркитди. Собиржонов ва Диёр Туропов қанот ҳимоячиларини ёпди. Натижада, “Локомотив” ҳимоячиси вазиятни ўзига олишдан бошқа чора топа олмади.

Икки хатони умумий тарзда нима боғлаб туради?

Биринчи навбатда икки эпизодда ҳам тўпни Жамшид Болтабоев олиб қўйганига эътибор қилинг! Майдон марказида босим уюштирган “лочинлар” ярим ҳимоячиси иккита эпизодда ҳам рақибнинг ўгирилиб олишига имкон қолдирмай, тўпни олиб қўйди. Бу голларни бемалол унинг ҳисобига ёзиб қўйиш мумкин.

Аслида, “Локо”нинг ўйин фалсафаси замонавий футболга яқин эканлиги учун ҳам мана шу голлар содир бўлди. Мураббий футболчиларини шунчаки тўпни олдинга тепиб юборишидан кўра, паслар орқали чиқиб кетишга ундаётгани аниқ. Бу ҳурматга лойиқ, бироқ ижро 2 эпизодда ҳам панд бериб қўймоқда. Ҳар икки вазиятда ҳам таянч ярим ҳимоячиси тўпни олиб чиқиб кетиш учун “пастроққа” тушиб, ҳимоячиларга вариант таклиф этиши лозим эди.

“Навбаҳор”нинг жисмоний тайёргарлиги ҳам голлардаги асосий омиллардан бири. Эътибор қилган бўлсангиз, “Локо” мудофааси ўйиннинг 3/2 қисми ўтган пайтга келиб (63 ва 56 дақиқалар) “Навбаҳор”нинг кучли прессингига дош бера олмади. Яхши жисмоний тайёргарлик ва эрта прессинг замонавий футболдаги асосий қуроллардан бирига айланиб бораётгани шу икки ўхшаш гол мисолида кўриниб турибди.

Яҳёхўжа Улуғхўжаев