Нега 2025 йил "Boxing Day" куни АПЛда фақат битта ўйин ўтказилади?

Кўпчилик "Boxing Day" атамаси билан Рождество ва Янги йил оралиғидаги бутун зич ўйинлар оралиғини тушунади. Аслида эса гап фақат 26 декабрь ҳақида кетмоқда. Англияда айнан шу сана "Boxing Day" — Совғалар куни сифатида нишонланади.

Анъанага кўра, "Boxing Day" куни Англияда футбол ўйинлари ўтказилади ва одатда айнан 26 декабрь турнинг асосий куни ҳисобланади. Айрим йилларда эса шу куни АПЛнинг барча учрашувлари бўлиб ўтган ҳолатлар ҳам кузатилган.

Бироқ 2025 йилда "Boxing Day" дастури фақат битта ўйин билан чекланади. Илк қарашда бу қарор футболчилар саломатлиги билан боғлиқдек туюлиши мумкин, чунки сўнгги йилларда зич тақвим бўйича шикоятлар кўпайган. Аммо асосий сабаб бошқа — телевизион шартнома.

АПЛ ва унинг ҳамкорлари мавсум бошидан тақвим тузилишини келишиб олган бўлиб, 38 турдан 33 таси дам олиш кунларига тўғри келади. 2025 йилда "Boxing Day" жума кунига тўғри келди. Телешартномага кўра, жума куни дам олиш кунлари турининг бир қисми ҳисобланади.

Маълумки, жума куни АПЛда фақат битта ўйин вақти мавжуд — маҳаллий вақт билан соат 20:00 (Тошкент вақти билан 00:00). Шу сабабли "Boxing Day" куни фақат битта ўйинни тақвимга жойлаштириш имкони бўлган. Қисқача айтганда, АПЛ телевизион мажбуриятларни бажариш учун кўпроқ ўйин ташкил қила олмади.

Шу билан бирга, анъанавий кўп ўйинли "Boxing Day"ни соғинган мухлислар учун яхши хабар ҳам бор. 2026 йилда "Boxing Day" шанба кунига, 2027 йилда эса якшанба кунига тўғри келади. Демак, кейинги йилларда "Boxing Day" дастури яна кенгроқ бўлиши аниқ.

2025 йил "Boxing Day" дастуридаги ягона ўйин — "Манчестер Юнайтед" – "Ньюкасл" баҳси бўлиб ўтади.